ڈاکٹر عبدالسلام: مجسمہ دی عالمی ایٹمی توانائی ایجنسی وچ مکھ وکھالی۔اساں بیہہ مکانا چاہندے ہاں؟

لاہور(مانیٹرنگ رپورٹ)اک دا بیہہ مکاندے مکاندے ایہہ ہور بہوں سارے فتنے کھڑے کرن وچ ہشیار
پاکستانی ریاست بیہہ مکاون دے کوڑ بیانیے نوں گل لائے کڈے چر توں کھلوتی ہے۔اک دا بیہہ مکاندے مکاندے ایہہ ہور بہوں سارے فتنے کھڑے کرن وچ ہشیار۔بیہہ مکاون دا کوڑ بیانیہ مہاراجہ رنجیت سنگھ دے خاندان توں آپ ملکہ برطانیہ شروع کیتا سی اتے مہاراجہ دے پتر نوں مسیحی کرن وچ ناکامی تیک اوس کوڑ بیانیے وچ بہوں کھپے۔حسین شہید سہروردی،ممدوٹ، کھوڑو، غفار خان تے وڈے اچکزئی دا بیہہ مکاندے مکاندے اساں کیہہ کجھ پیدا نہ کیتا۔پی پی پی نوں مکاندے مکاندے اساں ایم کیو ایم تے فرقو پارٹیاں کھڑی کیتیاں۔بھارت نوں مکاندے مکاندے اساں جہادی پالے اتے ہن نواز خاندان نوں مکاون لئی کس کس ’’ہیرے‘‘ نوں چک رہے ہاں ایہہ سب دے سامنے۔احمدیاں دا بیہہ مکانا وی اوہی ہشیار پالیسی جس تے انگریز دور توں کم جاری ہے۔عبدالسلام نوں نی منن پچھے وی ایہو ہشیار بیانیہ ہے جس نوں ریاست چھڈن لئی تیار نہیں بھانویں 1971 ہو جائے۔کیہہ احمدی غیر مسلم ہون پاروں پاکستانی اتے انسان وی نہیں؟ اقلیتاں بارے لکھی جان والی سرکاری کتاباں وچ وی انہاں دا ناں تک لکھیا نہیں جاندا کہ کیہہ اینج انہاں دا بیہہ مکا دیو گے؟ تساں غفار خان، اچکزئی، میاں افتخارالدین، منٹو، پی پی پی نوں مکا لتا ہے؟ ایہہ بیہہ مکان دا بیانیہ ہن مکانا ہو سی کہ کیہہ تساں بنگالیاں نوں مکاندے مکاندے آپ جناح دا پاکستان مکا نہیں دتا سی۔ نوبل انعام یافتہ پاکستانی سائنسدان ڈاکٹر عبدالسلام دے مجسمہ دی عالمی پدر تے وڈیائیاں ہوئیاں تے ساڈا کوڑ بیانیہ اک وار فیر ساڈے سامنے منہ چڑ ا رہیا ہے۔ایہہ مکھ وکھالی ایٹمی توانائی ایجنسی وچ کیتی گئی۔ بین الاقوامی ایٹمی توانائی ایجنسی دے ڈائریکٹر جنرل یوکیا امانو نے پاکستان دے عظیم سائنس دان دے مجسمے دی ویانا وچ رونمائیاں کیتیاں۔ 1926 وچ پنجاب دے ضلعے جھنگ وچ پیدا ہون والے ڈاکٹر عبدالسلام نے اپنے پنڈ وچ بجلی ویکھی سی نہ نیو کلیئر فورس ،پر اپنی محنت دے بل تے فزکس وچ نوبل انعام حاصل کیتاسی۔عبدالسلام نوں نہ من کے اساں اوسے کوڑ بیانیے دا اظہار کریندے پئے ہاں جو سانوں ساڈے ’’آقا ‘‘دے گئے سن اتے ساڈے طاقتور ادارے اوس دے راکھے نیں۔اوہ ایٹمی تونائیاں نوں امن پاروں ورتن دے داعی سن اتے اج پاکستان انہاں نوں منن توں انکاری۔