افغانستان: پوست پیداوار 64 %وادھو۔ایک کلو ہیروئن 15لکھ ڈالر۔وائس آف امریکہ

لاہور(مانیٹرنگ رپورٹ) جے17سالاں وچ امریکی اج وی پوست دی پیداوار تے قابو نہیں پا سکے تاں فیر دوجیاں نوں ڈو مور کیہہ آکھنا۔اک کلو ہیروئن دی قیمت پندرہ کڑوڑ روپیئے ہے پر جے ہیروئن افغانستان توں باہر لیجانی اوکھی ہو جائے تے ایہہ پندرہ ہزار دی وی نہ رہے گی۔جے 17سالاں وچ ایہہ کم نہیں ہو سکیا تے ویری باہر نہیں اندر ہی ہے۔اپنے اندر جھات مارن نال پتہ چلے گا پئی ہیروئن دا مال کون کون کھا رہیا ہے۔نراایہہ گل آکھن نال گل نہیں بن دی کہ ساڈا تھاواں تے کنٹرول نہیں؟ اینج جاپدا ہے پئی ارباں ڈالر کماون والی فصل نوں بڑے طریقیاں نال بچایا جا رہیا ہے۔کیہہ ات گردیاں دی آڑاں وچ کجھ گروہ سب نوں چونا ں لارہے نیں یا لمیری رقماں کماون وچ سب رلتی نیں؟ ہن تساں خبر پڑھو

دنیا وچ سب توں زیادہ افیون افغانستان وچ پیدا ہوندی جے۔ پچھلے سال دے مقابلے وچ ایس سال پوست دی ریکارڈ پیداوار ہوئی ہے۔ حکام دا کہنا ہے کہ ایہہ گل دہشت گردی تے منظم جرائم نال لڑائی دے سلسلے وچ اک بھیڑی خبر ہے۔ افغانستان دے وزیر برائے انسداد منشیات، سلامت عظمی نے وائس آف امریکہ دی پشتو سروس نوں دسیا کہ بھیڑے حالات پاروں حکومت پوست نوں تلف کرن دے پروگرام تے عمل درآمد نہ کراسکی جس وجہ توں منافع بخش فصل دی پیداوار وچ 64 فیصد دا وادھا ویکھیا گیا تے اینج ایس وقت ایہہ فصل 340000 ہیکٹر تے کاشت کیتی گئی۔ سلامت ہوراں توں پہلے ایسے وزارت دے پردھان رہن والے جنرل خدائے داد ہزارہ ورگے تجزیہ کاراں دا کہنا ہے کہ حکومت دی بدعنوانی تے کمزوریاں ایس سلسلے وچ مددگار نیں۔ باغیاں دی دھڑ بندی دے نتیجے وچ افغان حکومت نے ایس سال اپنا سارا دھیان کثیر آبادی والے علاقیاں نوں محفوظ بنان تیک رکھیا ہے۔ طالبان تے دوجے شدت پسند گروہاں ایس ابتری دا فیدہ چکیا اتے انہاں نے مزید زمین ہتھیالتی ہے تے اپنے عزائم دے فروغ لئی پوست دی کاشت وچ اضافہ کردتا ہے۔ پچھلے سال پوست دی پیداوار 201000 ہیکٹر تے کیتی گئی جس توں 47000 ٹن افیون پیدا ہویا جس وچ 2015 دے مقابلے وچ 46 فیصد تک اضافہ آیا۔ ذرائع نے وائس آف امریکہ دی پشتو سروس نوں دسیا کہ پچھلے سال دے مقابلے وچ ایس سال 10000 ٹن زیادہ افیون پیدا ہوئی۔ افیون چوں ہیروئن بن دی ہے۔ اقوامتحدہ دے دفتر برائے منشیات دے جرائم بارے اندازے دے مطابق پچھلے سال ملک دی مجموعی پیداوار وچ 16 فیصد دا اضافہ ہویا جس وچ مکمل زرعی شعبے دا دو تہائی توں زیادہ حصہ شامل سی۔ اقوامتحدہ دے دفتر برائے منشیات تے جرائم دے مطابق عدم استحکام شدت پسندی تے کشیدگی وچ اضافہ آن دے علاوہ منشیات دی پیداوار نجی تے پبلک سرمایہ کاری لئی مایوس کن معاملہ ہوئے گا۔ سال 2001 وچ پوست دی پیداوار وچ خاصی کمی ویکھی گئی سی جداں افغان قیادت والی حکومت نے ایس تے پابندی لائی سی۔ پر بعد وچ ایہہ ایس سطح توں ودھ گئی جداں امریکہ نے ملک نوں فتح کیتا۔ جداں کہ پچھلے سال ایہہ بہوں زیادہ ودھ گئی۔ امریکہ نے متبادل فصل اپنان لئی کاشتکاراں دی حوصلہ افزائی کیتی تاکہ ایس مسئلے نوں کیا جاسکے۔ منشیات دے انسداد توں متعلق امریکی اہل کاراں دا کہنا ہے کہ ہتھیار، رقماں تے دوجے فیدیاں پاروں طالبان سمگلراں نوں تحفظ فراہم کردے نیں۔ جداں اک کلو گرام ہیروئن استعمال کرن والیاں تک پہنچدی ہے تے ایس دی قیمت 15 لکھ ڈالر دے قریب ہوجاندی ہے ۔