افغان (مانیٹرنگ رپورٹ)جداں وی پاک افغان لیڈر ڈیورنڈ لین منن دی گل کردے نیں تے دونوں ملکاں وچ اک طوفان اٹھ جاندا ہے۔بھٹو، داو¿د تے شاہ ایران ایسے سیاست دا شکار ہوئے سن کہ تنوں ڈیورنڈ لین مکاون تے رل مل چلن تے تیار سن۔ 1976دے اخیری مہینیاں تے اج وچ فرق چین دی عالمی پوزیشن دا وی ہے اتے سرد جنگ توں نکل چکے روس تے امریکہ دا وی۔پرلندن والیاں دے ”کن“ پھڑکدے نیں کیونجے اوہ ایس پالیسی دے موڈھی نیں جس پاروں ایہہ خطہ مسلسل لڑائیاں تے بد اعتمادیاں دا شکار ہے۔جد کشمیر تے ڈیورنڈ لین جہے جھیڑے مک جاون تے ایس خطے دا کوئی جوڑ نہیں تے دونوں جھیڑے ”لندنی“ اعلی دماغاں دی ایجاد نیں۔عبدالطیف پدرمی افغان اسمبلی دے ممبر وی نیں تے نیشنل کانگرس پارٹی افغانستان دے صدر وی۔انہاں کابل وچ گل بات کردے سابق صدر حامد کرزئی نوں رگیدیا ہے جو ڈیورنڈ لین حوالے نال پرانے بیانیے دا راکھے نیں۔”پاکستان نال چنگے تعلقاں بعدوں ہی افغانستان وچ امن آئے گا“۔انہاں ایہہ وی آکھیا ہے پئی ساڈی سرکار چپ چپیتے تے ڈیورنڈ لین نوں منیندی ہے پر عوام سامنے نہیں منیندی۔ہن کھل کے گل کرن دا ویلہ آگیا ہے۔اقوام متحدہ وی ڈیورنڈ لین نوں باڈر منیندا ہے۔کڈی دہایاں توں اساں ایس مسئلہ تے اک دوجے نال لڑ رہے ہاں۔
پاک افغان باڈر تے دیوار کھڑی کرن تے فاٹا نوں عام آبادیاں نال رلاون بعدوں افغان سرکار نویں پالیسی ول ودھ رہی ہے۔پدرمی دے بیان توں پہلاں افغانستان دے چیف ایگزیٹو عبداللہ عبداللہ ایہہ بیان دے چکے نیں کہ عملی طور تے ڈیورنڈ لین ہی باڈر ہے۔افغانستان لئی امریکہ دے سابق نمیندے گراس مین سنے بہوں سارے امریکی افسران وی ایہو بیان دے چکے نیں۔اوہ قوتاں جہیڑیاں پاک افغان باڈر تے مسلسل ٹینشن دی متمنی نیں اوہ ہن کجھ زیادہ فرسڑیشن دا شکار نظر آرہیاں نیں۔جیڑے انہاں لڑائیاں تے پلدے نیں اوہ وادھو اوتاولے ہون گے۔کجھ عالمی قوتاں نوں وی ایہہ میل جول وارا نہیں کھاندا۔ویکھو اساں1976توں کڈے اگے آچکے ہاں۔جے افغانستاں سی پیک وچ رلن لئی ایہہ کم کر رہیا ہے تے ایہہ افغاناں لئی وی گھاٹے دا سودا نہیں۔پاکستان تے افغانستان اک وار فیر اہم موڑ تے نیں۔