کوئی حْب اللہ تے حْب رسولؐ دا ٹھیکدار نہیں، سرٹیفکیٹ نہیں چاہیدا۔داخلہ وزیر احسن اقبال

لاہور (مانیٹرنگ رپورٹ)اج قومی اسمبلی وچ گل بات کردے ہوئے وفاقی داخلہ وزیر آکھیا ہے پئی جہاد دے فتوئے گلی،محلے وچ نہیں دتے جاسکدے سگوں اید فیصلہ ریاست کر دی ہے۔اجہے رجحاناں نوں سوسائٹی توں مکانا ہو سی۔جے مسلمان فرقے آپسی لڑائیاں وچ رجھے رہن گے تے فیر سانوں کسے دشمن دی لوڑ نہیں۔کوئی حْب اللہ تے حْب رسولؐ دا ٹھیکدار نہیں جس توں سرٹیفکیٹ لتا جائے۔جیہڑے ایس طراں دے کماں وچ سوشل میڈیا نوں ورت رہے نیں انہاں خلاف سائبر کرائم قنون پاروں کاروائیاں کیتیاں جان گیاں۔چیتے رہے پئی پارلیمنٹ وچ سب نے رل مل کے ہک سانجھا قنون پاس کیتا سی کہ جس وچ گھاٹیاں دی گل ہوئی تاں سب نے ایس نوں ٹھیک کر دتا۔ایس بل نوں کیہہ بغیر پڑھے پارلیمانی کمیٹی پاس کیتاسی؟ فیر ایہہ قومی اسمبلی تے سینیٹ توں وی پاس ہویا۔غلطی دی نشاندہیاں بعدوں پارلیمنٹ ایس وچ مڑ ترمیم کر لتی۔پارلیمانی کمیٹی وچ پی ٹی آئی وی سی پر بل دی منظوریاں بعدوں ایہہ تاثر دتا گیا پئی پی ٹی آئی والیاں نے ایس بارے پہلاں گل کیتی سی۔ایس دوران پی ٹی آئی دے متوالیاں سوشل میڈیا تے بغیر تحقیقاں کیتے رولا پا دتا۔عمران خان تے آکھدے نیں پئی جداں ایہہ بل قومی اسمبلی توں پاس ہویا تے ساڈے ممبر اسمبلی نوں پتہ ہی نہ چلیا۔اینج انہاں اپنے اسمبلی ممبراں دا آپ مذاق اڈایا۔