کولیشن امدادی فنڈ جاری۔تازی خبر آئی ہے، امریکہ ساڈا بھائی ہے

لاہور(مانیٹرنگ رپورٹ)پورے ست سو ملین ڈالردی لمیری رقماں دی منظوریاں امریکی کانگرس دے چھڈیاں نیں پئی امریکی دفاعی وزیر ریاست پاکستان دی ات گرداں اتے مشہور زمانہ حقانی نیٹ ورک خلاف کاروئیاں بارے امریکی پارلیمنٹ وچ دہائیاں دتیاں نیں۔ لگدا ہے پئی خواجہ آصف دی امریکیاں نوں شیشہ وکھاون دی پالیسی کم کر گئی ہے۔ہن امریکی مخالفتاں ٹھنڈیاں پئے جان گیاں اتے امریکہ ساڈا بھائی ہے، تازی خبر آئی ہے والی پالیسی جاری ہو جائے گی۔جمعراتی امریکی پارلیمنٹ نے این ڈی اے اے 2018دی منظوریاں دتیاں جس پاروں کولیشن سپورٹ فنڈ(سی ایس ایف) والے اوہ350ملین ڈالر وی مل گئے جس بارے پانامہ فیصلے توں اک ہفتہ پہلے بلاک ہون دی خبر امریکی ہرکاریاں ولوں آئی سی۔این ڈی اے اے ولوں امریکی ڈیفنس ڈیپارٹمنٹ نوں آکھیا گیا ہے پئی اوہ ایس گل تے نظر رکھن کہ پاکستان واشنگٹن دی دتیاں رقماں نوں ات گرد مکاون لئی ہی ورت رہیا ہے یا نہیں۔جداں سیکٹری آف سٹیٹ دسے گا کہ پاکستان حقانی نیٹ ورک اتے لشک طیبہ سنے ات گرداں دی محفوظ پناہ گاواں مکاون لئی کم کر رہیا ہے تاں پہلی 350ملین ڈالر دی قسط جاری کیتی جائے گی۔ایہہ وی لکھیا ہے پئی پاکستان ات گرد پھڑیچے گا اتے پاک افغان باڈر نوں ہور تگڑا کرے گا۔ایہہ وی آکھیا گیا ہے پئی امریکی ایس گل تے وی نظر رکھن پئی پاکستان وچ مسیحاں،احمدیاں، ہندواں،بلوچاں، سندھیاں تے ہزارے والیاں جہے اقلیتی دھڑیاںْ ْْْخلاف کم تے نہیں ہورہیا۔ خبر دا لنک وی تھلے دتا جا رہیا ہے۔