ات گردیاں نال کھلواڑ:مودی ’’صلاح الدین لالی پوپ‘‘ تے راضی۔چین مخالفتاں دا گھما

لاہور (مانیٹرنگ رپورٹ)صلاح الدین ہوراں نوں ات گرد آکھن دی ٹائمنگ ایس گل دا وڈا ثبوت کہ ات گردیاں دے الزام فارن پالیسیاں نوں سامنے رکھ کے لائے جاندے نیں۔ات گردیاں خلاف مہماں امریکی خارجہ پالیسی دے تھلے لگیاں ہوئیاں نیں کہ بھارت نوں خش کرن لئی ’’صلاح الدین نوں ات گرد ‘‘ آکھن دا تحفہ پادشاہ ٹرمپ نے دتا ہے۔ایہہ اوہ بیانیہ ہے جس نال امریکی صدر دنیا بھر دے ات گرداں نوں للکار رہیا ہے۔کدی سلامتی کونسل دی ممبر شپ دے ترلے تے ہن اک صلاح الدین نوں ات گرد آکھوا کے بھارت اپنا بوتھا ہور وگاڑ رہیا ہے۔کیہہ ٹرمپ ہوراں اک ضدی بچے نوں لالی پاپ تے ٹرخایا ہے؟ کشمیر اک متنازعہ تھاں ہے اتے ایس بارے اقوام متحدہ دی قرارداداں وی نیں اتے پاکستان تے بھارت دوناں ایس دی متنازعہ حثیتاں نوں منیندے وی نیں۔اپنے ولوں تے ٹرمپ مودی رل کے صلاح الدین نوں ات گرد آکھیا ہے پر اید حرکت پاروں اک پاسے اوس دا قد ودھے گا تے دوجے پاسے ات گردیاں خلاف چلائی جان والی مہماں نوں وی کوڑ سمجھیا جائے گا۔مودی نوں امریکہ توں کجھ نہیں لبھیا پر ہن اوہ جاپان نال رل کے چین مخالف ایجنڈے دا ہرکارا بن گیا ہے۔بھارت نوں ایہہ گل چیتے رکھنی لوڑی دی ہے کہ ایس سی او وچ بیٹھ کے اوہ چین مخالف ایجنڈے تے زیادہ زور نہیں دے سکدا۔اینج جاپدا ہے کہ دونوں اک دوجے نوں چکر دے رہے نیں۔چکت کھا کے کون پہلے ڈگدا ہے ایس بار وی سب سامنے آجائے گا۔پاکستان تے وی چین مخالف ایجنڈے وچ رلن دا دبا ہے اتے امریکی، برطانوی ہرکارے وی وادھو نیں۔میڈیا وچ وی انہاں شافی چوہے لاہے ہوئے نیں۔جے پاکستان ایران تے افغانستان نال چینی مشوریاں نال چلدا ہے تے بھارت خطہ وچ زیادہ پواڑہ نہیں پا سکے گا۔