یونیورسٹیاں وچ انتہا پسندیاں:وی سییاں دے اکٹھ نال آرمی چیف خطاب کرن گے۔

لاہور(مانیٹرنگ رپورٹ)پاکستان دے اعلیٰ تعلیمی اداریاں وچ ودھدی ہوئی انتہا پسندی دے تدارک لئی پاک فوج دے شعبہ تعلقات عامہ (آئی ایس پی آر) تے ہائر ایجوکیشن کمیشن ولوں جنرل ہیڈ کوارٹرز (جی ایچ کیو) دے آرمی آڈیٹوریم وچ پیر 8 مئی نوں سیمینار بعنوان انتہا پسندی مسترد کرن وچ نوجواناں دا کردار منعقد کیتا جارہیا ہے جس وچ نوجواناں وچ برداشت تے ہم آہنگی نوں ا±جاگر کیتا جائے گا۔اکٹھ وچ ملک بھر دی تمام سرکاری تے نجی یونیورسٹیاں دے وائس چانسلراں نوں وی بلالیتا گیا ہے۔اکٹھ توں آرمی چیف جنرل قمر جاوید باجوہ خطاب کرن گے۔ آرمی چیف جنرل باجوہ سیمینار نال وی خصوصی خطاب کرن گے۔ سیمینار وچ افتتاحی کلمات ڈی جی آئی ایس پی آر میجر جنرل آصف غفور ادا کرن گے۔ سیمینار تے اجلاس وچ رلت لئی تمام یونیورسٹیاں دے وائس چانسلراں نوں خط پتر گھل دتے گئے نیں۔ سیمینار وچ مختلف موضوعاں تے پروفیسر اپنے خیالاں نوں سانجھا کرن گے اتے ایس وچ انتہا پسندی نال جڑے خطریاں، انتہاپسندی دے مذہبی پچھوکڑ، انتہا پسندی تے طلبا دے حوالے نال گل بات کردیاں تعلیمی اداریاں تے میڈیادے کردار بارے گل کیتی جائے گی۔ہن تے ڈاکٹر عاصم ہوراں وی سندھ ہائر ایجوکیشن کمیشن دے پردھان دا چارج مڑ سنبھال لتا ہے ،ہورے انہاں نوں وی سدیا گیا ہوئے۔ایوبی دور وچ جداں اسمبلیاں تے ملک وچ سیاستاں تے پابندیاں لگیاں سن تے سیاست تعلیمی اداریاں وچ وڑن تے مجبور سی اتے فیر افغان جہاد دی پود وی اساں یونیورسٹیاں توں کڈن لئی لیفٹ لبرل استاداں نوں فارغ کیتا گیا سی۔جس طراں نجی تعلیم نوں ضیا شاہی توں پروموٹ کیتا گیا اوس نال پبلک یونیورسٹیاں دا معیار ہور تھلے گیا کہ جتھوں کدی علامہ اقبال تے ڈاکٹر عبدالسلام نکلدے سن اتھوں جہادی کڈے گئے۔جہادی پالیسیاں نال تعلیمی معیار تھلے گیا تے تعلیمی معیار تھلے جان توں بعد مارکیٹ لئی نکارہ نیں۔انہاں وچ غصہ ودھن دے کئی کارن کہ جو نصاب پڑھ کے اوہ نوجوان اعلی اداریاں وچ آندے نیں اوس پاروں اک ذہن انہاں دا بند چکیا ہوندا ہے۔دنیا بھر وچ پونیورسٹیاں پالیسی سازی وچ حصہ پاندیاں نیں پر ساڈے ایتھے ایہہ کم وی کجھ ہور ہے۔ اج ساڈی یونیورسٹیاں وچ نہ ہی اکڈیمک فریڈم ہے تے نہ ہی معیاری تعلیم۔مشال خان تے سفورا ورگے وقوعے ایہہ دس پا رہے نیں کہ اساں اپنے تعلیمی بندوبست نال کیہہ کیتا ہے۔