ایہہ آزادی تے حملہ ہے۔نواز:ججاں تے فوج خلاف ٹویٹ کرن دے الزام پاروں گرفتاریاں

لاہور(مانیٹرنگ رپورٹ) 26اکتوبر توں پہلاں پہلاں ہر پاسیوں زور لگ رہیا ہے۔این اے120دی چوناں ویلے وی بندے چکن دے الزام سامنے آئے سن۔اینج جاپدا ہے پئی کجھ دناں وچ کٹی کٹا نکل آئے گا۔پاکستان دی سب توں وڈی پارٹی دے صدر اتے ترے وار وزیراعظم بنن والے میاں نواز شریف سائبر کرائم پاروں پھڑیچے بندیاں دے حق وچ بیان دتا ہے۔انہاں داخلہ وزارت نوں حکم دتا ہے پئی اوہ ایس بارے تحقیقاں کرے۔ایہہ آکھیا جا رہیا ہے پئی پھڑیچے بندیاں ن۔لیگ دے حق وچ پوسٹاں لاندے سن۔نواز شریف آکھیا ہے کہ  مخالف نقطہ نظر والیاں نوں دھر لینا درست نہیں۔وائس آف امریکہ نال گل بات کردے ہوئے سوشل میڈیا صارفاں لئی کم کرن والے اسامہ خلجی آکھیا پئی تنقیداں کرنیاں ہر شہری دا آئینی حق ہے۔ سوال تے ایہہ پئی ایہہ ابرار احمد کون ہے؟ ہن تساں بی بی سی دی خبر پڑھو۔
19 اکتوبر نوں سائبر کرائم ایکٹ دے تحت درج کیتی جان والی ایف آئی آر ابرار احمد نامی شخص دی درخاست تے درج کیتی گئی ہے۔ بی بی سی دی خبر پاروں ایف آئی آر وچ آکھیا گیا ہے کہ راولپنڈی دی ریلوے کیرج فیکٹری کالونی دے رہائشی انور عادل تنولی تے واجد رسول نامی بندیاں ٹوئٹر تے سپریم کورٹ دے ججاں، فوج تے حکومتِ پاکستان وغیرہ دے بارے وچ غیر قنونی طریقے توں بدنیتیاں والی گلاں پھیلا رہے سن۔ ایف آئی آر دے مطابق ایسی معلومات توں نہ صرف عوام وچ بے چینی پھیلن دا اندیشہ سی سگوں ایہہ اداریاں خلاف نفرت پھیلان وانگ سی۔ ایسی وجہ توں انہاں افراد دے خلاف 2016 دے سائبر کرائم ایکٹ دے متعدد دفعات دے تحت مقدمہ درج کیتا گیا۔ نامہ نگار دے مطابق ایف آئی اے نے مقدمہ درج کرکے انور عادل تنولی نوں پھڑیچ لتا ہے تے سوشل میڈیا تے انہاں دی گرفتاری دی خبراں گرم نیں۔ انور عادل تنولی شمار سماجی روابط دی ویب سائٹس تے پاکستان دی حکمران جماعت پاکستان مسلم لیگ ن دے ہمدرداں وچ ہوندا ہے۔ bring-back-Atanoli# ایس وقت وی پاکستان وچ ٹاپ ٹرینڈز وچ شامل ہے۔ 19 اکتوبر توں انہاں دے غائب ہون دے بعد توں سوشل میڈیا تے سماجی کارکن تے مسلم لیگ ن توں تعلق رکھن والے کارکن مسلسل ایس بارے وچ خدشیاں دا اظہار کررہے سن ۔پر مسلم لیگی قیادت ولوں ایس سلسلے وچ کوئی بیان یا ٹویٹ ویکھن وچ نہیں آیا سی۔ خیال رہے کہ پچھلے سال پاکستان وچ سائبر کرائم قنوناں دے نفاذ دے بعد سوشل میڈیا تے قابل اعتراض مواد شائع کرن دے الزام وچ ہن تک متعدد افراد گرفتار کیتے جاچکے نیں۔ رواں سال جون وچ کوئٹہ وچ ایف آئی اے نے ہی وزنامہ قدرت کوئٹہ دے چیف رپورٹر تے اخبار دے مالک دے پُتر ظفر اللہ اچکزئی نوں سوشل میڈیا تے مبینہ طور تے قابل اعتراض مواد شائع کرن دے الزام وچ گرفتار کیتا سی۔بی بی سی ایہہ نہیں دسیا پئی ظفر نوں بعد وچ چھڈ دتا گیا سی اتے کیس وی کوئی نہیں بنایا گیا۔کیہہ ایہہ سب اک کھیڈ ہے؟