ترمیم تے ترمیم: اپوزیشن کس نوں چکر دے رہی ہے؟نانی تے خصم

لاہور(مانیٹرنگ رپورٹ)نانی خصم کیتا ، بھیڑا کیتا، کر کے چھڈیا، ہور بھیڑا کیتا۔اپوزیشن جاندی ہے پئی اوس کول قومی اسمبلی وچ پورے ووٹ نہیں ، فیر ایسی ترمیم دی کیہہ حیثیت ہے؟ ایہہ اک ایسے بینک دا چیک ہے جیہڑا بند ہو چکیا ہے۔جداں اپوزیشن ایہہ جاندی ہے فیر ترمیم دا کیہہ ٹیچا ہے؟کیہہ کوئی نویں حاضری ہے؟ایس بارے وی پتہ چل جائے گا۔پہلی ترمیم کنج پاس ہوئی سی ایہہ سب جاندے نیں، جے اپوزیشن ایس بارے پورا سچ عوام اگے رکھ دیندی تاں فیر وی اوس دی کجھ گل بن جاندی۔پہلی ترمیم پاروں سب پارٹیاں اک دوجے دے مفاد دا خیال رکھیا سی تاں مارے گل نری شو کاز نوٹساں تیک رہی سی۔ہن تے سینیٹ والیاں نوں یقین ہے پئی ایہہ کدی پاس نہیں ہوئے گی تاں لیپا توپی لئی ایس وچ کوئی حرج نہیں۔کجھ میڈیائی ناخدا سیاستداناں نوں ایس ترمیم دے پاس ہون بعدوں اخلاقیات دا سبق دے رہے نیں۔کیہہ ضیا دا62تے63 اخلاقیات تے پورا اتردا ہے؟ایس توں بعدوں عدالت ایہہ آکھ دتا پئی آئینی ترمیم بارے فیصلہ قنون پاروں کراں گے اخلاقیات پاروں نہیں۔ ہورے سینیٹ دی ایس ترمیم دا ٹیچا وی ایہو ہوئے کہ عدالت نوں آکھیا جائے پئی پارلیمنٹ ایس مسلہ تے ونڈی ہوئی ہے۔پر ایس نال کیہہ پارلیمنٹ دے دوناں ایواناں توں پس کیتی پہلی ترمیم تے ونونی طور تے کوئی اثر پئے گا؟ترمیم تے ترمیم کر کے سینیٹ آپدا رانجھا راضی تے کیتا ہے پر عزت گنوا کے۔اخیر ایس دی لوڑ کیہہ سی؟پوائنٹ سکورنگ یا فیر گل نانی دے خسم کرن تے چھڈن والی ہی ہے۔