ارطغرل غازی کی پاکستانیوں کو عید کی مبارکباد دینے کے ساتھ ایک خوبصورت پیغام

2020 ,مئی 25



کراچی(مانیٹرنگ ڈیسک): ڈراما سیریل ’’ارطغرل غازی‘‘ میں ارطغرل کا کردار نبھانے والے ترک اداکار انجن التان دوزیاتن نےعید الفطر کے موقع پر پاکستانیوں کو عید کی مبارکباد دینے کے ساتھ ایک خوبصورت پیغام بھی دیا ہے۔ پاکستان کے سرکاری ٹی وی چینل پی ٹی وی نے اپنے فیس بک اکاؤنٹ پر گزشتہ روز ایک ویڈیو شیئر کی جس میں انجن التان دوزیاتن (ارطغرل غازی) پاکستانیوں کو عید کی مبارکباد دیتے نظر آرہے ہیں۔ انجن نے کہا بہنو اور بھائیو السلام و علیکم میرے پاس آپ کی ناقابل یقین محبت اور پزیرائی کا شکریہ اداکرنے کے لیے الفاظ کافی نہیں ہیں، جو آپ پی ٹی وی کے ارطغرل غازی اردو کو دے رہے ہیں۔

انہوں نے مزید کہا میں پی ٹی وی کا شکریہ ادا کرنا چاہتاہوں جس نے ارطغرل غازی کو آپ سب تک پہنچایا۔ اس کے بعد انجن التان نے تمام پاکستانیوں کو اردو میں عید مبارکباد دیتے ہوئے کہا ’’آپ سب کو میری طرف سے عید مبارک‘‘۔ سلامت رہیں بہنو اور بھائیو سلامت رہو پاکستان۔ اپنے پسندیدہ ترک اداکار کی جانب سے عید مبارک کا پیغام ملنے کے بعد پاکستانی بہت خوش ہیں اور اتنا خوبصورت پیغام دینے پر ان کا شکریہ ادا کررہے ہیں۔

متعلقہ خبریں