جنگل بچاو¿، ایہہ ساڈا صدیاں پرانا ورثہ جے۔موٹر سائیکل تے مہم

لاہور (مانیٹرنگ رپورٹ)دو موٹر سائیکل سواراں اک نواں طریقہ لبھیا اتے لوکاں نوں جنگلاں دی اہمیتاں بارے احساس دوان لئی لہور توں موٹر سائیکلاں تے پشور،کوئٹہ جا پہنچے۔اوہ پورے3200کلومیٹر دا سفر کر کے مڑ لہور آون گے۔انہاں وچوں مکرم کریم جہاں گرد میڈیا نال گل بات کردے ہوئے دسیا کہ ایہہ گیارہ دناں دا ٹور ہے۔ ہن تیک اساں اوکاڑہ، خانیوال، ملتان، ڈیرہ غازی خان،لورالائی، زیارت،کوئٹہ، ڑوب،ڈیرہ اسمائیل خاں،کوہاٹ،پشور تے اسلام آباد داسفر کر چکے ہاں۔اساں لوکاں نوں دسیا ہے پئی چھانگا مانگا،زیارت، کوہاٹ، اٹک،بہاولپور تے اسلام آباد دے آل دوال جنگلاں دی صورتحال ماڑی ہے۔ ایہہ جنگل ساڈا صدیاں پرانا ورثہ ہے۔جے ایہہ نہ رہیا تے ایتھے موسم وی بدل جان گے تے وسوں وی ماڑی ہو جا سی۔جداں اساں زیارت اپڑے تے اوہ 21مارچ دا دیہاڑ سی جو عالمی پدر تے جنگلاں دی راکھی دے حوالے نال انٹرنیشنل ڈے دے طور منایا جاندا ہے۔اتھے ایس حوالے نال پروگرام ہو رہیا سی جس وچ اساں رلت کیتی۔ساڈے کول دنیا دے قدیمی درخت نیں، تساں صنوبر(Juniper)ہی نوں ویکھ لو، جے اساں لاپرواہی کیتی تے ایہہ سب تباہ ہو جا سی۔صوبائی تے وفاقی سرکاراں دے نال نال ہر شہری نوں درخت وی لانے چاہیدے نیں۔ایس ٹور لئی روٹری کلب تے کراس رووٹ موٹر سائیکل ٹریولرز کلب والیاں سپانسر کیتا سی۔مزاحمت بغیر جلسے جلوساں توں وی کیتی جاسکدی ہے اتے اگے ودھے انقلابیاں نوں ایس توں سبق لینا چاہیدا ہے۔