کوئٹہ حملے بعد وں گرجا گھراں دی سکیورٹی سخت: سارازورپاک ایران باڈر تے کیوں؟

لاہور(مانیٹرنگ رپورٹ) وائس آف امریکہ دی ایس ہشیار خبر وچ شہید ہون والے مسیحاں اتے پاکستانی مسیحاں دی اوکڑاں بارے گلاں گھٹ نیں اتے افغانستان ، پاکستان تے ایران دی سانجھی تھاواں تے پنگرن والی نویں جتھے بندیاں دے تذکرے وادھو۔کوئٹہ وچ وسن والے مسیحاں دی بہوں وڈی گنتری پنجابی ہے جیہڑے1935دے خوفناک زلزلے بعدوں ایس شہر نوں مڑ کھڑا کرن لئی آون والے پنجابیاں وچ رلتی سن۔کیہہ ات گرداں تے پلس یا سیکورٹی والیاں وچ پہلاں توں کجھ مقابلا ہو رہیا سی؟ جیہڑا اندر وڑ گیا سی اوس نوں کس روکیا تے اوس بارے تے میڈیا کوئی خبر نہیں چلائی؟ایس خبر وچ وی ان جیداراں بارے کوئی گل رلتی نہیں جنہاں اوس نوں روکیا تے اوہ پہلاں ہی پاٹ گیا۔سارا زور خراسان ول ہے جیہڑا ایرانی علاقہ ہے۔ایہہ وی نہیں لکھیا پئی جتھے وڈی پدر تے سمگلنگ ہوندی ہے اوتھے تساں ات گردیاں نوں کنج ڈک سکدے ہو؟پاکستانی بلوچستان دے نال ایرانی تے افغانی سرحداں پاروں جیہڑی تکون بندی ہے اوس بارے وی کجھ ذکر اذکار نہیں۔بلوچستان وچ پنجابیاں نوں ٹارگٹ کرن دا سلسلہ بہوں چر توں ودھ رہیا ہے جس نال بلوچستان بارے کوڑ گلاں پھیلانیاں اوکھیاں نہیں رہندیاں۔کل جداں ٹرمپ نویں سیکورٹی پالیسی دا اعلان کیتا تے ایس وچ ایران مخالف بیانیہ اگڑواں سی۔ پاکستان سعودی اتحاد دا وی حصہ ہے اتے تاں مارے پاک ایران باڈر نوں ٹھنڈا رکھن دی گل کرنی لوڑی دی ہے۔ ہن تساں وائس آف امریکہ دی ہشیار خبر پڑھو تے ذرا سوچو پئی ایہہ عالمی میڈیا کس ہشیار ایجنڈے پاروں خبراں دیندا ہے؟
پاکستان دے جنوب مغربی صوبے بلوچستان دے دارالحکومت کوئٹہ وچ اک گرجا گھر تے اتوار نوں خود کش حملے دے بعد ملک بھر وچ مسیحیاں دی عبادت گاواں دی سکیورٹی ودھا دتی گئی ہے۔ پاکستان وچ مسیحی آبادی دوفی صد دے نیڑے نیڑے ہے اتے ایس توں پہلاں وی انہاں نوں نشانہ بنایا جاندارہیا ہے۔ کرسمس ویلے گرجا گھراں دے باہر سکیورٹی دے اضافی بندوبست کیتے جاندے نیں پر ہن کوئٹہ وچ حملے دے بعد کرسمس توں اک ہفتے پہلے ہی سکیورٹی مزید تگڑی کردتی گئی ہے۔ کوئٹہ وچ اتوار نوں گرجا گھر تے کیتے جان والے حملے وچ گھٹ وگھٹ نو لوک شہید تے درجناں زخمی ہوگئے سن۔ ایہہ حملہ ایسے وقت کیتاگیا سی جداں مسیحی برادری نال جڑے ہورے 400 لوک اوتھے اک دعائیہ اکٹھ وچ رلتی سن۔ پلس دسیا ہے پئی اک خودکش حملہ آور نوں چرچ دے باہر ہی پلس نے گولی مار کے ہلاک کردتا سی جداں کہ دوجا مرکزی دروازے تک اپڑگیا سی۔ شدت پسند تنظیم داعش خراسان نے ذمہ واری قبول کرن دا دعوی کیتا ہے۔ داعش نے شام تے عراق دے اک وسیع علاقے تے قبضہ کرکے اوتھے ناں نہاد خلافت کھڑی کیتی سی جس دے بعد شدت پسند تنظیم نے اپنا دائرہ اثر خراسان تک ودھان دی کوششاں کیتیاں سن۔ تریخی اعتبار توں پراناخراسانی علاقہ افغانستان ،پاکستان دے آل دوال سی۔ پاکستان افسر کہندے آئے نیں کہ افغانستان دے مشرقی علاقے وچ داعش خراسان اپنے قدم جمارہی ہے تے ایس تنظیم دی ودھدی ہوئی سرگرمیاں پاکستان لئی وی خطرہ نیں۔ پاکستان وچ ایس توں پہلے وی داعش خراسان کئی وڈے حملیاں دی ذمہ واریاں قبولن دے دعوے کرچکی ہے۔ پر پاکستانی حکومت ملک وچ داعش دے پکے ٹھکانیاں نوں نہیں منیندی۔ پاکستان دے صدر ممنون حسین نے پِیر نوں اک اکٹھ نال گل بات کردے آکھیا کہ کوئٹہ وچ گرجا گھر تے ہون والے حملے توں دہشت گرد پاکستانی معاشرے وچ ونڈ پیدا کرنا چاہندے نیں۔ انہاں نے آکھیا ایس مرحلے تے مسیحی برادری نال تعلق رکھن والے لوکاں نے ملک وچ اقلیتیاں نوں تحفظ فراہم کرن دا مطالبہ کیتا ہے۔ ایس توں پہلے پشاور وچ 2013 نوں اک گرجا گھر تے خودکش حملہ ہویا سی تے گھٹ و گھٹ 80 لوک شہیدتے درجناں زخمی ہوگئے سن۔ پچھلے سال لہور ایسٹر دے موقع تے وی اک پارک وچ مسیحی برادری نال تعلق رکھن والیاں نوں خودکش بم حملے وچ نشانہ بنایا گیا سی جس وچ بچیاں تے عورتاں سنے70 شہید ہوئے سن۔ لہور وچ ہون والے خودکش حملے دی ذمہ واری کالعدم تحریک طالبان پاکستان دے دھڑے الاحرار نے قبولی سی۔ پاکستان وچ پچھلے سالاں وچ دہشت گردی دے واقعات وچ ہولے ہولے گھاٹے آئے نیں پر پچھلے کجھ مہینیاں وچ اک وار فیر دہشت گردی دی کاروائیاں وچ تیزیاں ویکھی جا رہیاں نیں۔ خاص طور تے صوبہ بلوچستان وچ پلس تے سکیورٹی فورسز تے حملیاں توں اڈ صوبہ کے پی کے تے افغان سرحد توں جڑیاں قبائلی تھاواں وچ وی عسکریت پسنداں ولوں ایسی کاروائیاں وچ شدت آئی جے۔