تربت:،سی پیک کم کردے 15پنجابی قتل؟پنجابی مرے، خیر ہے۔دبئی، گوادر جھیڑا،ایرن چین مخالفتاں

لاہور(مانیٹرنگ رپورٹ)گوادر پاروں کون کون پریشان ہے؟ جیہڑے گوادر، تربت جاندے نیں اوہ جاندے نیں پئی بلوچ لبریشن آرمی یا فرنٹ نوں متحدہ عرب امارات توں کیوں مدد ملدی ہے۔ پر بی بی سی اتے وائس آف امریکہ دی ہشیار خبراں وچ ایس دا ذکر اج کل نہیں ملے گا اتے ایس دا لشکارا ساڈھے میڈیا تے وادھو۔بی بی سی بی ایل اے والیاں دے بیان نوں چھاپیا ہے جس وچ ایہہ دسیا گیا ہے پئی ایہہ سب پنجابی سی پیک وچ ملازمتاں کردے سن۔ایس گل دی کھوج سرکار نوں لانی چاہیدی ہے۔ایہہ بیان ایس دا وڈا ثبوت پئی گوادر، تربت وچ پنجابیاں، سندھیاں دے قتل چین مخالفتاں دے سلسلے دا حصہ ہے۔پر میڈیا ایس نوں انسانی سمگلنگ نال جوڑ کے کراہے پانا چاہندا ہے کیونجے دبئی والیاں خلاف گل کرنی چنگا کم نہیں۔دوجے پاسے ایران دے باڈر نوں گرم کرنا وی اج کل پردھان تازے ایجنڈیاں وچ رلتی۔انسانی سمگلنگ دی بلوچستان وچ وڈی تھاں اوہ تکونی رستہ جتھے افغانستان، ایران تے پاکستانی بلوچستان کوئٹہ کول ملدے نیں۔ایہہ انسانی سمگلنگ باڈر والیاں توں بغیر ہوندی ہے؟ کیہہ دبئی والیاں توں توجہ ہٹاون لئی انسانی سمگلنگ ول کہانی ٹوری جا رہی ہے؟ ایہہ پہلے پنجابی نہیں جنہاں نوں ماریا گیا ہے؟ جداں دا گوادر پراجیکٹ شروع ہویا اوس دور توں ایہہ سلسلے جاری نیں۔بلوچستان توں کدی کدی افسراں دے سمگلنگ وچ پھڑے جان دی خبراں وی آندیاں نیں پرسزاواں دین دی تھاں مک مکا ہو جاندا ہے۔تازی خبر پاروں ایہہ دسیا گیا ہے پئی لاشاں نوں کراچی لیاون توں بعد پنجاب گھلیا جائے گا۔
کمشنر مکران بشیر احمد نے بی بی سی دے خبرچی محمد کاظم نوں دسیا کہ انہاں لوکاں دی قتل دا واقعہ منگل دی رات پیش آیا سی تے مرن والے غیر قنونی طور تے ملک توں باہر جان دی کوشش کررہے سن۔ بشیر احمد دے مطابق انہاں افراد نوں بلوچستان دے ضلع کیچ دی تحصیل تربت دے علاقے گروک وچ گڈی توں لا کے فائرنگ کرکے قتل کیتا گیا۔ لاشاں نوں کیچ دے ضلعی ہسپتال گھل دتا گیا۔ بلوچستان حکومت دے ترجمان انوار الحق کاکڑ نے بی بی سی نوں دسیا ہے کہ مرن والیاں دا تعلق پنجاب دے مختلف اضلاع توں ہے اتے چار دا ضلع سیالکوٹ، تِن دا ضلع منڈی بہاؤ الدین، دو ضلع گوجرانوالہ، جداں کہ اک دا واہ کینٹ تے گجرات توں دسیا گیا ہے جداں کہ چار لاشاں دی شناختاں نہیں ہوسکیاں۔ انوار الحق کاکڑ الزام عائد کیتا کہ انہاں لوکاں دے مرن دی ذمہ وار کالعدم شدت پسند تنظیم بلوچستان لبریشن فرنٹ ہے۔ بلوچستان لبریشن فرنٹ نے وی اک بیان وچ انہاں لوکاں نوں مارن دی ذمہ واریاں قبولیاں نیں۔ تنظیم دے بلارے دعویٰ کیتا ہے کہ مارے جان والے بندے عسکری تعمیراتی کمپنی فرنٹیئر ورکس آرگنائزیشن دے ملازم سن تے ضلع کیچ وچ چین پاکستان اقتصادی راہداری دے منصوبے تے کم کررہے سن۔ چیتے رہے کہ بلوچستان دے سرحدی شہراں مند تے تفتان دے رستے ہر سال ہزاراں دی گنتری وچ پاکستان توں غیر قنونی طور تے یورپ تے خلیجی ملک جان والے ایران وچ داخل ہوندے نیں۔ حکومت پاکستان ولوں انہاں علاقیاں وچ سکیورٹی دے سخت انتظاماں دا دعویٰ کیتا جاندا ہے پر ایس دے باوجود بلوچستان دے رستے پنجاب توں یورپی تے خلیجی ملکاں نوں انساناں دی سمگلنگ دا سلسلہ مکمل طور تے رُکیا نہیں ہے۔ کوئٹہ وچ ایف آئی حکام ایہہ کہندے رہندے نیں کہ انسانی سمگلنگ دے دھندے وچ کئی پردھان ملوث نیں تے ایس پاروں انسانی سمگلنگ دے ایجنٹ گرفتار ہون دے باوجود ثبوت تے گواہ نہ ہون دی بنیاداں تے عدالتاں توں رہا ہوجاندے نیں۔