صوفی مشال شہید کیس:خیبر پی کے دی آزادپلس پی ٹی آئی دا کونسلر نہ پھڑ سکی۔نرے تن ملزماں جرم قبولیا

مردان (مانیٹرنگ رپورٹ)مشال قتل کیس وچ گرفتاریاں تے34ہو چکیاں نیں پر ہلے تیک تن مرکزی ملزماں نوں پلس پھڑ نہیں سکی جنہاں وچ صوبے دی حکمران پارٹی داکونسلر اتے مردان دا پارٹی لیڈر عارف وی رلتی ہے۔ہلے تیک عارف نوں پارٹی توں کڈہن دا کوئی حکم جاری نہیں ہویا۔اج جیو نیوز نے پی ٹی آئی دے کونسلر دے نہ پھڑن جان دی خبر جاری کیتی پر کجھ دن پہلاں خانزادہ دے پروگرام وچ کونسلر دے پھڑیچن بارے دسیا گیا سی۔ ڈان دی رپورٹ وچ دسیا گیا ہے پئی ہن تیک پھڑیچے34بندیاں وچوں نرے تن ملزماں جج دے سامنے مشال تے تشدد نوں قبولیا ہے اتے بہوں سارے پلس نوں دتے بیاناں توں مکر چکے نیں۔سپریم کورٹ وی ایس کیس نوں سن رہی ہے اتے ایس دی تریخاں لمیاں نہیں پینی چاہیدیاں اتے ایس وچ بے گناہواں تے جلوس وچ رلتی پر تشدد نہ کرن والیاں، اکساون والیاں تے تشدد کرن والیاں نوں وکھ وکھ کر کے کیس چلانا لوڑی دا ہے۔سیکولر اے این پی اپنے مردان دے لیڈر نوں شوکاز نوٹس دتا ہے پر ایس حساس ماملے وچ رلتی منڈیاں نوں پارٹیاں توں کڈ کے انہاں کولوں تفتیشاں کرنیاں لوڑی دیاں نیں۔سوشل میڈیا تے مشال دے ٹرینڈ تے اک ویڈیو ٹوائیٹ کیتی گئی ہے جس بارے دعوی کیتا گیا ہے کہ ڈی ایس پی حیدر خان وی لوکاں نوں اکسان والیاں وچ رلتی سی۔ میڈیا تے مشال کیس بارے خبراں گھٹ گیاں نیں۔