سینیٹ وچ ترمیم: کس نے کس نوں دھوکہ دتا یا سب رلے سن؟یا انہونی دا ڈر؟

لاہور(مانیٹرنگ رپورٹ) اپوزیشن والے اک دوجے تے الزام دھر رہے نیں پر جے تسی ایم کیو ایم، اے این پی، پی پی پی، جماعت اسلامی، مسلم لیگ (ق)،مسلم لیگ(ف) اتے تحریک انصاف دے سینیٹراں نوں رلاو تاں ایہہ پورے53بن دے نیں۔اپوزیشن نوں نرے36ووٹ ملے اتے اک ممبر سرکار نوں ووٹ دتا۔ پئی سوال ایہہ ہے کہ باقی16 کتھے گئے؟عمران خان دے ست سینیٹر سن پر انہاں دی پارٹی نے قومی اسمبلی وچ کیہڑا تیر چلایا سی؟ ہن اوہ بڑی معصومی وچ آکھدے نیں پئی سانوں قومی اسمبلی وچ تے پتہ ہی نہیں چلیا۔ایہہ سادگی ہے یا اعترافی بیان یا ہشیاریاں یا فیر اپنے ہی اسمبلی ممبراں خلاف۔وچلی گل کوئی نہیں کرداپئی ایس62،63 دے ہتھوڑے توں بچنا ہر کسے دے مفاد وچ ہے۔دوجے پاسے مسلم لیگ(ن)، جے یو آئی،نیشنل پارٹی تے پختونخوانیپ دے سینٹراں دی گنتری کل ملا کے38 بن جاندی ہے ۔ ایس ویلے مسلم لیگ(ن) سینیٹ وچ 27سیٹاں نال سب توں وڈی پارٹی جے۔دس سینیٹر آزاد نیں تے دو بی این پی عوامی اتے اک بی این پی (اے) دے نیں۔اینج104دے ایوان وچ نرے73سینیٹراں ووٹنگ وچ رلت کیتی۔31سینیٹر ایس وچ شامل نہیں سن۔مسلہ ایہہ نہیں کہ مسلم لیگ(ن) سمارٹ کھیڈی ہے اتے نہ ہی مسلہ ایہہ ہے کہ پی ٹی آئی توں کوئی غلطی ہوئی ہے۔پی پی پی تے ایم کیو ایم وی پتے ویکھ کے ہی کھیڈ رہے نیں۔انکاری صورتحال دی آپدی تھاں اہمیتاں وادھو پر کجھ ہشیارسانجھ وی ہے۔اینج لگدا ہے پئی گنجھل ودھدے جارہے نیں اتے کجھ قوتاں صرف لڑائیاں چاہندیاں نیں۔ ایسے وی نیں جیہڑے سمجھدے نیں پئی جے لڑائی ودھ گئی تے کم ہور چوڑ ہو جا سی تے فیر سب انہونی ول ودھ جان گے۔لگدا ہے انہونی دے ڈر توں ہی ایہہ ترمیم پاس ہوئی ہے۔ویسے اج اک اینکر اعتزاز احسن دا خیال وی دسیا ہے کہ جے اپوزیشن دی ترمیم پاس وی ہو گئی تے مسلم لیگ(ن) پارلیمنٹ دے سانجھے سیشن توں ایس بل نوں منظور کروا سکدی ہے ۔ کیونجے ایہہ بل قومی اسمبلی نے منظور کیتا سی اتے جے سینیٹ ایس نوں منظور نہ کرے تے فیر سانجھا سیشن ہونا لازم۔جداں اوہ ڈک ہی نہیں سکدے سن فیر ایڈا رولا کیہہ سی؟ ایہہ رولا انہاں پایا جیہڑے کجھ ہور چاہندے نیں۔ سارا دن کدی میاں عتیق نوں لمے پاندے سن ، کدی نواز دے دوالے، کدی پی ٹی آئی نوں سناندے تے کدی پی پی پی اتے جماعت اسلامی نوں۔