افغان نائب صدر رشید دوستم دے خلاف سابق گورنر نال جنسی زیادتی دا مقدمہ: سزا ہونی چاہیدی۔امریکی سفیر

لاہور(مانیٹرنگ رپورٹ)سیاسی مسلیاں نوں ذاتی حملیاں پاروں اگے ودھان دی ریت پرانی کہ دوستم نوں ترکی دی مدد نال دوجے افغان دھڑیاں نال رل کے اتحاد بناون دی سزا دتی جارہی ہے؟ کدی ایہہ ازبک شمالی اتحاد دے وڈکیاں وچوں اک سی تے طالبان مکاؤ پراجیکٹ پاروں ایس دی خبراں وادھو سن پر اج اوس دی کردار کشیاں۔اینج جاپدا ہے پئی امریکی سفیر کابل وچ وائسرائے ہے۔
امریکہ نے افغان حکومت تے زور دتا ہے کہ اوہ پہلاں نائب صدر خلاف جنسی زیادتی دے مقدمے وچ قنون تے انصاف نال فیصلے کرے۔ پہلے افغان نائب صدرعبد الرشید دوستم دے خلاف کئی مہینیاں توں ایہہ تحقیقاں ہورہیاں نیں کہ انہاں نے اپنے اک سیاسی مخالف نوں جنسی تشدد دا نشانہ بنایا سی۔ 63سالہ رشید دوستم ازبک نیں تے اوہ اک جنگجو سردار وی نیں۔ مئی دے آخر وچ 6 دوستم ہوری ایہہ کہندے ہوئے جہاز وچ بیٹھ کے ترکی ٹر گئے سن کہ انہاں نوں علاج دی لوڑ ہے۔ انہاں دے ملک چھڈن دے بعد ایہہ الزامات لگنے شروع ہوگئے کہ انہاں نے مقدمات توں بچن لئی افغان صدراشرف غنی نال لکواں معاہدہ کیتا سی۔ افغانستان لئی امریکہ دے عارضی سفیر انہاں دے خلاف کیوں بولے نیں اتے وائس آف امریکہ ایہہ ہشیار خبر کیوں چھاپی؟ ایہہ سب دوستم ہوراں دے ترکی جان توں وی پتہ چلدا ہے۔
سفیرنے منگل دے دن آکھیا کہ دوستم دے خلاف الزامات انتہائی سنگین نیں تے افغانستان دے نظام انصاف نوں ایس دا گہری نظر نال جائزہ لینا چاہیدا ہے۔ پچھلے سال اک افغان صوبے دے سابق گورنر احمد ایشچی نے قومی ٹیلی وژن تے اپنے اک انٹرویو وچ الزام لایا سی کہ رشید دوستم دی ملیشیا فورس نے انہاں نوں پھڑیا تے اسلحے دے زور تے انہاں دے نال جنسی تشدد کیتا۔ انہاں دا کہنا سی کہ ایس دا حکم دوستم نے دتا سی۔ رشید دوستم نے ایہہ الزام مسترد کردے ہوئے آکھیا سی کہ ایس دی بنیاد سیاسی ہے تے انہاں نے تفتیشی عہدے داراں نال تعاون کرن توں انکار کردتا۔ پر ایس واقع تے ملک دے اندر تے باہر بہت شور اٹھیا تے صدر اشرف غنی تے ایہہ دباؤ ودھیا کہ اوہ دوستم نوں انصاف دے کٹہرے وچ لیان۔ امریکی سفارت کار دا کہنا سی کہ ایس معاملے نوں سیاسی رنگ دنیا نسلی کشیدگیاں تے قنونی دی حکمرانی لئی نقصان دہ ہوئے گا تے ایس توں افغانستان دے امن تے استحکام دی کوششاں نوں وی نقصان پہنچے گا۔ امریکی سفارت کار دا اشارہ جماعت اسلامی حذب وحدت اسلامی تے دوستم دی جنبش ملی پارٹی دے سیاسی گروپ ول سی۔ ایس سیاسی اتحاد دا اعلان ایس مہینے دے شروع وچ ترکی نال کیتا گیا سی ۔انہاں ولوں ریفارمز توں متعلق اک فہرست صدر اشرف غنی نوں دتی گئی سی۔ دوستم دے کجھ ناقدین دا کہنا ہے کہ ایس فہرست دا مقصد افغانستان دی اتحادی حکومت تے دباؤ پا کے احمد ایشچی دے الزاماں دی تحقیقاں نوں ڈکناہے۔ اتحاد وچ شامل دوجی دو جماعتاں دے لیڈر اہم حکومتی عہدیاں تے فائز نیں۔ افغان صدر اشرف غنی دا کہنا ہے کہ رشید دوستم دے خلاف تحقیقاں وچ اوہ مکمل طور تے غیر جانب دار نیں۔ انہاں نے دسیا کہ نائب صدر اٹارنی جنرل دی اجازت نال ملک توں باہر گئے نیں کیونجے قنون کسی نوں علاج پاروں دوجے ملک جان توں نہیں ڈکداتے رشید دوستم تے بہت بیمار نیں۔