بحریہ انکلیو اسلام آباد/اے آر وائے کیس کتھے گیا؟اینکر کیوں چپ نیں؟سب”ریاض“ کر رہے نیں؟

لاہور (مانیٹرنگ رپورٹ)دو بندیاں دے مرن اتے 100توں وادھو بندیاں دے زخمی ہون دے باوجود میڈیا کیوں چپ رہیا؟سپریم کورٹ سوموٹو لتا سی اتے اسلام آبادی انتظامیہ کولوں ریکارڈ وی منگوایا سی تے جواب وی منگیا سی۔عدالت وچ پلس تے انتظامیہ دی رپورٹاں اک دوجے نال میل نہیں کھاندیاں۔مرن والی زنانی اک فوٹوگرافر دی بیوی سی تے اوہ فوٹوگرافر ایوان صدر دا ہے پر لگدا ہے کجھ پردھان میڈیا تے ایوان صدر توں وی تگڑے نیں۔پلس رپورٹ وچ زخمیاں دی گنتری 136تے دوجی رپورٹ وچ نری 92ہے۔ اک موقعے تے موجود بندے بلاگ وی لیکھیا ، عدالت اوسے نوں بلا لے تے لوکاں نوں گواہیاں لئی بلاون دا ٹیکر چلوا دے۔سب سامنے آجائے گا جس تے پلس، انتظامیہ تے میڈیا پردے پا رہے نیں۔اگلی پیشی کدوں ہوئے گی ایس دی کوئی خبر نہیں کہ ہشیار تے باکمال کورٹ رپورٹراں تے اینکراں دی کہانی ایڈی ہی ہے۔صوفی مشال قتل کیس ، طیبہ تشدد کیس وانگ ایہہ مقدمہ وی عوامی مفاداں ول الار رکھدا ہے اتے اجہے مقدمے جڈے لمے ہون گے اوس نال ایہو تاثر تگڑا ہو سی کہ پرویز مشرف وانگ ایتھے بہوں گروہ، بندے قنون توں وڈے نیں اتے جتھے میڈیا وی در وٹ لیندا ہے۔ایس وڈی حقیقت نوں نہ ریاست منیندی ہے تے نہ ہی میڈیا سنے دوجے گروہ۔ایس بارے سب انکاری صورتحال دا شکار نیں۔ایہہ کل دی گل ہے جداں ناں تے اکاوئنٹ نمبراں نال رقماں لین والے صحافیاں دی لسٹاں جاری کیتی گیاں سن اتے فیر کجھ عرصے بعدجس تے ایہہ لسٹاں جاری کرن دا الزام سی اوسے دے انٹرویو انہاں صحافیاں کیتے،پر اوس لسٹ بارے اک سوال وی نہ کر سکے۔جے بحریہ انکلیو اسلام آباد/اے آر وائے کیس بارے میڈیا چپ رہے گا تے ایہہ سوال بار بار اٹھدا رہے گا۔اہم گل ایہہ نہیں کہ کون کڈی کھپ پاندا ہے؟ پر وڈی گل ایہہ ویکھنا ہے کہ کیہڑا چینل کتھے در وٹ لیندا ہے۔150دناں تیک ایہو فیصلہ نہ ہو سکیا سی کہ طیبہ تشدد کیس کس عدالت تے سننا ہے؟ مشال کیس وچ 40دن لنگ چکے کہ ہلے گرفتاریاں ہی ہو رہیاں نیں تے موقعے تے موجود پلس والیاں بارے تے گل ہی نہیں شروع ہوئی۔صوبے دی حکمران پارٹی دا کونسلر پھڑیا نہیں جا سکیا تے صوبے دا گارڈ فادر وی چپ۔28اپریل نوں بحریہ انکلیو اسلام آباد وچ جوہویا اوس بارے کڈیاں خبراں آئیاں ایہہ سب جاندے نیں۔کیہہ اپوزیشن تے کیہہ آزاد صحافت، کیہہ سب ”ریاض“ وچ لگے رہن گے؟ اساں پچھلی خبراں دا لنک تھلے دے رہے ہاں جیہڑیاں وچار مئی دی گیارہ تے تیرہ تریخاں نوں چھاپیاں سن اتے سپریم کورٹ انہاں ترے ماملیاں تے سٹینڈ لتا ہے۔انہاں دا توڑ اپڑنا وی لوڑی دا ہے۔ویسے کل اک وار فیر قنون دے راکھیاں وکلا کنونشن وچ جنج اپنا آپ وکھایا اوہ ایس گل نوں پکا کردا ہے کہ ایتھے ہر طاقتور قنون توں انکاری ہے کہ ٹی وی تے بیٹھ کے جنج حامد خان ہوری ایس نوں ڈیفنڈ کر رہے سن اوہی ساڈا بوتھا ہے۔جتھے گل اپنے اندر جھات پاون دی آندی ہے اوتھے سب در وٹ لیندے نیں۔