اگلے ہفتے پاکستان بھارت شہنگائی آرگنائزیشن دے ممبر بن جاسن۔آپسی سانگے چنگے ہون گے۔ چینی خارجہ وزارت

لاہور (مانیٹرنگ رپورٹ)دونوں ملک اک ہی ویلے برطانیہ دے چنگل توں آزاد ہوئے سن کہ ٹھیک 70 سال پہلے اج دے مہینے ہی پاکستان تے بھارت دے لیڈراں نویں ملکاں دے حوالے نال اک معاہدے تے دستخط کیتے سن ہن اگلے ہفتے دونوں ملک خطہ دے سب توں وڈے اتحاد شہنگائی کو آپریشن آرگنائزیشن (SCO) دے ممبر بن جاسن۔ ایہہ عالمی اتحاد 2001 وچ چین اساریا سی کہ جے بھارت وچ گجرال فارمولے خلاف ساو¿تھ ہال سازشاں نہ کیتیاں ہوندیاں تاں پاکستان تے بھارت 10 سال پہلاں ایس دے ممبر بن گئے ہوندے۔ قازقستان دے وچلے شہر ”آستانہ“ وچ ایس سی او دا اکٹھ 8-9جون نوں ہورہیا ہے۔ ایس تواریخی موقع تے بیجنگ وچ SCO دے مرکزی دفتر وچ سیشل جھنڈا لہران دا پروگرام ہوئے گا۔ ایس ویلے SCO دے ممبران وچ چین، روس،قازقستان، تاجکستان، کرغیز ستان تے ازبکستان رلتی نیں اتے بھارت، پاکستان رلن نال ایہہ اک وڈا تحاد ہوجاسی۔ ایران وی ممبر بنن دی درخاست دتی ہوئی ہے۔ ایران توں اڈ افغانستان، سری لنکا، منگولیا، ترکی تے بیلو روس دی درخاستاں بارے وی پروسس جارہی ہے۔ چین دی خارجہ وزارت دی بلارن” ہوا چنگ “آکھیا ہے کہ سانوں امید ہے کہ بھارت تے پاکستان SCO دے چارٹر تے عمل کرن گے اتے ایس اتحاد وچ رلت پاروں دوناں ملکاں دے آپسی سانگے وی تگڑے ہون گے۔ بھارت نوں اک پاسے چین نال لڑن دا ٹھیکہ ملن دی امید ہے پر انہاں اپنا سارا زور چین مخالفت تے نہیں لایا سگوں SCO نال سانگے وہ ودھا رہیا ہے۔ جے بھارت تے پاکستان ایس اتحاد وچ ہون گے تاں انہاں وچ لڑائیاں دے چانس گھٹ ہوجاون گے۔
چین بڑی سمجھداری نال پتے ترتیب دتے نیں اتے ایس اتحاد پاروں اوہ سنٹرل ایشیا، مغربی ایشیا، جنوبی ایشیا تے یوریشیا نوں رلاون ول ودھ رہیا ہے۔ دنیا کیہ توں کیہ ہورہی ہے تے اساں ہلے وی آپسی لڑائیاں وچ لگے ہاں۔ایس نویں اتحاد توں کون کون ڈردا ہے اتے کون لک یا کھل کے ایس دی مخالفتاں کر رہیا ہے ایس تے سب دی نظر ہے۔پاکستانی تے بھارتی میڈیا وچ اج کل چین مخالفتاں والی لکھتاں تواتر نال چھپ رہیاں نیں۔سرحدی لڑائیاں اتے سمگلنگاں تے پلن والیاں اتے چینی سرمایہ کاریاں نوں ”نواں نو آبادیاتی بندوبست“ آکھن والیاں وچ سانجھ بہوں دلچسپ سٹڈی ہے۔ پاک انڈیا سانگیاں لئی کم کرن والیاں وچ وی پاڑ ہے کہ کجھ ہرکارے پاک انڈیا دوستی دے نرے اوس صورت حامی نیں جداں ایہہ امریکہ، برطانیہ کروائے۔ساڈا میڈیا جس طراں ایس سی او دی میٹنگ بارے گھٹ خبراں چھاپ رہیا ہے اوہ ایہہ سمجھن لئی کافی ہے کہ چین مخالف لابی ایتھے بہوں تگڑی جے۔