چین تے پاکستان دو پاسیوں حملہ کر سکدے نیں۔بھارتی آرمی چیف

لاہور(مانیٹرنگ رپورٹ)بھارتی فوجی چیف بپن راوٹ آکھیا ہے پئی شمال ولوں کمیونسٹ چین توں ہی حملے دا خطرہ نہیں سگوں چین تے پاکستان رل کے بھارت دا کانڈ بچہ کوہلو کرن لئی کم کر رہے نیں۔اوہ سنٹر فار لینڈ وار فیئر سٹڈیز دی تقریب نال خطاب کر رہے سن۔بھارتی آرمی چیف نے چین خلاف اک ایسے موقعے تے بیان جاری کیتا جداں وزیراعظم بھارت مودی ہوری چین نال سانگے ودھان دا تاثر دے رہے نیں۔چین دا ذکر کردے ہوئے بھارتی آرمی چیف نے 'salami slicing' دی فوجی ٹرم ورتی جس دا مطلب ہے کہ چین اک وڈی جنگ توں پہلاں خفیہ تے پراکسی لڑائیاں نال بھارت نوں اندر توں ونڈے گا۔راوٹ ہوراں دا آکھنا سی پئی پاکستان ایس چینی سازش وچ ہر حد تیک جائے گا۔پاکستان نال ساڈے سانگے چنگے نہیں ہون گے۔اینج جاپدا ہے پئی بھارتی آرمی چیف ڈوکلام توں 73دناں بعدوں بھارتی فوج دی واپسی تے خش نہیں نہ ہی انہاں نوں مودی دی چین یاترا چنگی لگی ہے۔