استعفی نہیں دواں گا،موگابے۔چین برطانیہ جھیڑے،ہک ہور شکار۔فوج برطانیہ نال؟ڈر چوناں دا۔

لاہور(مانیٹرنگ رپورٹ) نوآبادیاتی انگریز حاکماں نال 15  سال گوریلا لڑائیاں لڑن بعدوں1980وچ ملک آزاد کروان والے رابرٹ موگابے اک پاسے جاگیرداراں خلاف لینڈ ریفارمز کیتیاں سن جس پاروں گوری چمڑی والے چٹے جاگیرداراں نوں نکرے لایا گیا سی اتے دوجے پاسے موگابے دا تازہ جرم چینی سرمایہ کاریاں ول اْلار کہ اوس نوں عبرتاں دا نشان بنانا افریقہ وچ قبصیاں لئی لوڑی دا سی۔نوآبادیاتی ادارے پرانے حاکماں دے مفاداں دا گھما پئی پاکستان تے زمباوے وچ بہوں ساری سیاسی سانجھ۔موگابے تے 1987وچ صدارتی بندوبست وی بنا لتا سی اتے1997وچ لینڈ ریفارمز کر کے نوآبادیاتی اشرفیہ نوں لمے پایا سی پر چینی صدر دے دورے بعدوں اوس خلاف وڈی مہماں ٹر پیاں سن۔چوناں سر تے نیں اتے فوج جاندی ہے پئی لوک موگابے دے نال نیں تاں مارے ہن فوج اگے دا بندوبست کر رہی ہے۔برطانوی سرکاری میڈیا دے بوتھے بی بی سی(انگلش) وچ تے برطانوی خارجہ دفتر دے پردھاناں دے بیان چھاپے نیں پئی انہاں نوں ہمیش توں موگابے تے شک سی۔لینڈ ریفارمز بعدوں برطانیہ نے زمباوے لئی امداں وی بند کیتیاں سن اتے پابندیاں وی لائیاں سن کہ ایس پالیسی نوں قدامت پرست تے ٹونی بلئیر سب اگے لے کے چلے سن۔اج ہک ہور برطانوی اخبارگارڈین اک ہشیار خبر پاروں ایہہ تاثر دتا ہے پئی فوج نے چین دی مرضیاں نال ایہہ کاروائیاں کیتیاں نیں۔پر جداں دسمبر2015 نوں چینی صدر زمباوے دا دورہ کیتا سی تے ایسے اخبار لکھیا سی پئی چینی تے ہک لمیرے چر توں موگابے دی گوریلا جنگ نوں مدد دیندے رہے نیں اتے ہن موگابے چین اک مک ہو رہے نیں۔جداں موگابے ملک تے قوم دی آزادیاں لئی گوریلا جنگ کر رہی سی تے ایہو زمباوے دی فوج برطانوی نوآبادیاتی حاکماں دے آکھن تے گوریلیاں نوں ماردی سی۔اج جداں جمہوری تسلسل جاری ہے اتے چوناں نیڑے نیں تے فوج نوں کدی کرپشن یاد آندی ہے تے کدی وراثتی سیاستاں کہ اصل لڑائی تے نوآبادیاتی حاکماں دے مفاداں دی راکھی تے فوج دی مداخلت ہے۔ہن تساں ساڈے میڈیا دی رپورٹنگ پڑھو جس وچ اصل کہانی گول نظر آندی ہے۔

ہن رابرٹ موگا بے دی قسمت غیر یقینی بن چکی ہے۔ اوہ 37 سال اقتدار وچ رہے نیں تے اینج لگدا ہے کہ انہاں نوں ہٹان دی کوشش دے پچھے فوج دا ہتھ ہے۔ اک طویل عرصے توں عہدے تے فائز رہن والے زمبابوے دے صدر نوں اپنے گھر تک محدود کردتا گیا ہے۔ ہرارے وچ صورت حال وگڑرہی ہے۔ زمبابوے وچ فوج نے ملک دے دارالحکومت دا کنٹرول سنبھال لتا ہے پر فوجی جرنیلاں صدر رابرٹ موگابے دی حکومت دا تختہ الٹن دی خبراں نوں کوڑ آکھیا ہے۔ زمبابوے دی فوج دے دستیاں نے منگل دی رات دارالحکومت ہرارے وچ سرکاری نشریاتی ادارے دے صدر دفتر دا کنٹرول سنبھال لتا سی جداں کہ فوجی اہلکاراں نے اپنی گڈیاں کھڑی کرکے ملکی پارلیمان ول جان والے رستیاں نوں وی بند کردتا ہے۔ دارالحکومت دے مرکز وچ فوجی دستیاں دے گشت کرن دی وی خبراں نیں جداں کہ منگل تے بدھ دی درمیانی راتی دارالحکومت وچ واقع صدر موگابے دے گھر دے نیڑے وی فائرنگ دی آواز سنی جاندی رہی سی۔ فوج ولوں سرکاری ٹی وی تے جاری کیتے جان والے اک بیان وچ آکھیا گیا ہے کہ صدر موگابے تے انہاں دے اہل خانہ محفوظ نیں تے انہاں دی سکیورٹی یقینی بنائی گئی ہے۔ فوج دے اک افسر میجر جنرل سیبوسیسو مویو نے سرکاری ٹی وی تے اک تحریری بیان پڑھدے ہوئے آکھیا ہے کہ فوج صرف انہاں جرائم پیشہ لوکاں نوں نشانہ بنا رہی ہے جو صدر دے اردگرد موجود نیں تے جس طراں ہی ایہہ مشن مکمل ہوئے گا، صورت حال ٹھیک ہوجا سی۔ جنرل مویو نے ایہہ وضاحت وی کیتی کہ فوج دی ایہہ کاروائی حکومت دا تختہ الٹن یا اقتدار سنبھالن لئی نہیں ہے۔ زمبابوے دی حکمران جماعت زانبو پی ایف تے فوج دے درمیان حالیہ کجھ دناں دے دوران کشیدگی وچ اضافہ ہویا سی تے حکمران جماعت نے اک دن پہلے ہی فوج دے سربراہ جنرل کونسنٹینو چیوینگا تے تنقیداں کیتیاں سن اتے سازشاں وچ رلن بارے اشارے کیتے سن۔ فوج دے سربراہ نے صدر موگابے ولوں موگابے تے اپنے نائب صدر ایمرسن ننگگوا نوں کڈہن تے تنقید اں کردے ہوئے سیاسی صورت حال بہتر نہ ہون تے فوجی مداخلتاں دی دھمکی دتی سی۔ صدر موگابے دی عمر 93 سال ہے تے اوہ 1980 وچ زمبابوے دی برطانیہ توں آزادی دے بعدوں ملک تے حکومت کررہے نیں۔ اوہ ایس وقت دنیا دے کسی وی ملک دے سب توں عمر رسیدہ پردھان نیں ۔ کجھ سالاں دے دوران صدر ولوں اپنی 52 سالہ بیوی گریس موگابے نوں اہم عہدے تے ذمہ واریاں دین دے بعد عام تاثر ایہہ ہے کہ اوہ اقتدار اپنی اہلیہ نوں سونپن دین گے۔