لاہور(مانیٹرنگ رپورٹ)کارویہار تے بزنس بارے مشہور امریکی رسالے فوربز اک نواں سروے چھاپیا ہے جس وچ انہاں 100بندیاں دی رینگنگ کیتی ہے جیہڑے ٹیکنالوجی پاروں اج سب توں زیادہ مالدار نیں۔انہاں سو بندیاں وچ پنجواں حصہ یعنی20 چینی باشندے نیں۔انہاں سو بندیاں کول اک ٹریلین ڈالر(اک ہزار ارب ڈالر) توں ودھ رقم ہے جیہڑے لکھاں ارب روپیئے بن دے نیں۔
پہلے اٹھ امیر کبیر ارب پتیاں وچ سب توں وڈا مالدار امریکہ دا بل گیٹس ہے۔ایس دی اثاثیاں دی مالیت84.5ارب ڈالر ہے۔ایس نے اک امدادی ڈونر تنظیم بل گیٹس فاونڈیشن ب

نائی ہے جیہڑی ڈونرشفافیت انڈیکس وچ بڑی تھلے ہے۔ٹیکنالوجی پاروں دوجا امیر کبیر بندہ وی امریکی ہے جدا ناں جیف بیزوز(Bezos) ہے اتے ایہہ مشہور کمپنی ایمازونAmazon دا مالک ہے۔ایمازون اوہی کمپنی ہے جس دا ذکر یورپی یونین دی رپورٹ وچ ہے ۔کیونجے انہاں آف شور جنتاں وچ رقماں رکھیاں نیں تاں مارے ایس تے ٹیکس بچاون دا الزام ہے۔ایس کول 81.7ارب ڈالر نیں۔اینج جاپدا ہے پئی امیر ترین لوک ٹیکس بچاون لئی لوک سیوا نوں ورتدے نیں۔تیسرا وڈا مالدار وی امریکی ہی ہے اتے ایہہ فیس بک دا مالک مارک زکر برگ جے۔ایس کول69.6 ارب ڈالر نیں۔ناں توں ہی جاپدا ہے پئی ایہہ جرمن نژاد ہے۔ایس2004وچ فیس بک شروع کیتی سی جداں اوہ ہارورڈ یونیورسٹی وچ سن۔چوتھا وڈا ارب پتی مشہور سافٹ وئیر کمپنیOracle دا مالک لیری ایلیسن ہے اتے ایہہ وی امریکی ہی ہے۔ایس دے اثاثیاں دی مالیت59.3ارب ڈالر جے۔5ویں نمبر تے وی اک امریکی لیری پیج ہے جیہڑا گوگل نوں جمن والی کمپنی Alphabet انٹرنیشنل دے دو مالکاں وچوں اک ہے۔ایس دی مالیت43.9ارب ڈالر ہے۔6واں مالدار اک روسی نژاد امریکی سرجی میخائلووچ برن ہے جیہڑا Alphabet انٹرنیشنل دا دوجا مالک ہے۔چیتے رہے، ایمازون وانگ گوگل دا ناں وی یورپی یونین دی رپورٹ وچ ہے جنہاں تے ٹیکس بچاون دا الزام ہے۔7ویں تے8ویں نمبراں تے دو چینی نیں جیہڑے بدلدی دنیا دا لشکارا نیں۔ستویں نمبر تے انٹرنیٹ بزنس لئی مشہور کمپنی علی بابا گروپ دا پردھان Ma Yun ہے جیہڑا جیکMa آکھواندا ہے۔ ایہہ ایشیا دا سب توں مالدار بندا ہے۔ایس دے اثاثیاں دی مالیت37.4ارب ڈالر ہے۔اوس1999وچ علی بابا گروپ دی نیہہ رکھی سی جداں اوہ امریکہ توں اپنے ملک واپس آیا سی۔اوس نے اپنے کیرئیر دا آغاز انگریزی دے لیکچرار توں کیتا سی۔ اٹھویں نمبر تے وی اک چینی پونی ما جے۔اوہ اکتوبر1971وچ جمیا سی اتے مشہور چینی کمپنی ٹین سینٹ دا مالک ہے۔ایس دے اثاثیاں دی مالیتاں36.6ارب ڈالر ہے اتے ایہہ ایشیا دا دوجا وڈا مالدار ہے جیہڑا ٹیکنالوجی پاروں امیر ہویا۔ایس دا پیو چینی کیمونسٹ پارٹی دا لیڈر سی۔ پہلے اٹھ وچ دو اتے پہلے سو وچ20چینیاں دی رلت پاروں ایہہ آکھیا جا رہیا ہے پئی چین ہولے ہولے اپنا رنگ وکھا رہیا جے۔ایہو وجہ ہے پئی چین مخالف مہماں وی تیز ہو رہیاں نیں۔