سوشل میڈیا: فوج، مقدس ہستیاں تے عدلیہ خلاف گل کرن والیاں نوں پھڑاں گے۔نثار، پارلیمنٹ دا ذکر ہی نہیں

لاہور (مانیٹرنگ رپورٹ)داخلہ دے وزیر چوہدری نثار اج سوشل میڈیا بارے آپدے خیالاں بارے سب نوں چانن کروا دتا۔انہاں آکھیا کہ مادر پدرسوشل میڈیا نہیں چلن دواں گے۔انہاں اپنی گفتگو وچ ایہہ گل من لتی کہ اوہ نرے انہاں لوکاں خلاف ہی کاروائیاں کر سکدے نیں جو پاکستان وچ رہندے نیں۔حلانکہ اوہ انہاں پاکستانیاں خلاف وی کاروائیاں نہیں کر سکدے جنہاں کول دہری شہریتاں نیں یا اوہ کسے ہور ملک دی شہریتاں رکھدے نیں۔ایہہ اوہ گل جس بارے ساڈا آزاد میڈیا وی گل نہیں کردا کہ دہری شہریتاں والے ساڈے نویں ناخدا۔روزنامہ جنگ وچ لکھیا گیا ہے کہ نثار ہوراں مقدس ہستیاں، فوج تے عدلیہ خلاف لکھن والیاں نون پھڑن دی گل کیتی ہے پر جو خبراں بی بی سی نے چلائیاں اتے جنگ دے چینل جیو تے چلیاں انہاں وچ عدلیہ دا ذکر گول۔بی بی سی رپورٹ پاروں وزیر ہوراں اج دسیا کہ ہن تیک 28بندیاں نوں فوج خلاف گل کرن تے پھڑیا پر ہر اک نوں اپنا وکیل نال لیاون دی اجازتاں سن۔انہاں وچوں کسے نوں پھڑیچیا نہیں گیا۔انہاں ایہہ دعوی وی کیتا کہ جداں دا ایف آئی اے نے سوشل میڈیا تے توہین والے مواد خلاف کم کیتا ہے تے سوشل میڈیا توں اجیہا مواد غیب ہو گیا ہے۔وزیر ہوراں پارلیمنٹ راہیں سوشل میڈیا بارے پالیسی بناون دی گل تے کیتی پر جداں اوہ سوشل میڈیا تے فوج، مقدس ہستیاں تے عدلیہ خلاف گل کرن والیاں نوں پھڑن بارے آکھیا تے اوہ پارلیمنٹ نوں بھل گئے۔ جے اوہ پارلیمنٹ توں قنون بنوا کے ایہہ کم کردے تاں ایس دی ایڈی مخالفتاں نہ ہوندیاں۔ایس دی وڈی مثال سائبر کرائیم بل ہے۔ چوہدری ہوری ایہہ گل نہیں جاندے کہ سوشل میڈیا وچ کوئی ایڈیٹر نہیں ہوندا تے اوس نوں اک باٹم لائن دین لئی سب توں وڈا فورم پارلیمنٹ ہے۔ جے ایہہ رستہ اپنایا جاندا تاں بحثاں بعد کوئی اجہیا قنون بنن جاندا جس تے ایڈا رولا نہ پیندا۔