16 اکتوبر نوں اومان دے وچلے شہر مسقط وچ امریکہ، افغانستان، پاکستان اتے چین ڈیڑھ سال بعدوں مڑ رل مل بیٹھے اتے افغانستان اتے پاک افغان باڈر دے آر پار ہون والی ات گردیاں نوں مکاون اتے امن لیاون لئی گل بات شروع کیتی۔ جنوری 2016 وچ ایس اکٹھ نوں اساریا گیا سی اتے 5 مہینیاں وچ ایس وچلی گلاں طے کرلیاں سن۔ ایس اکٹھ دا ناں کیو سی جی یعنی Quadrilateral Coordination Group ہے۔ ایس گروپ پہلے 5 مہینیاں وچ وڈے فیصلے کر لتے سن۔ افغانستان وچ حملیاں اتے ملا منصور دے ڈرون وچ مرن بعدوں مئی 2016 بعدوں ایس د

ے اجلاس بند ہوگئے سن، ہن جداں گل بات مڑ شروع ہوئی تے ایس دا اعلامیہ جاری ہی نہیں کیتا گیا۔ ایہہ اکٹھ جو کجھ اپریل تے مئی تک دے پنج اجلاساں وچ طے کیتا سی کیہ اوس بارے اج کوئی جھیڑا ہے؟میڈیا وچ امریکی نائب صدر دے خاقان ہوراں نوں فون بارے تے بہوں خبراں پر ایس گروپ کیہڑے فیصلے کیتے ایس بارے چپ۔
ایکسپریس ٹربیون اج 16 اکتوبر والے 6ویں اکٹھ تے رپورٹ چھاپی ہے ایس دا لنک تھلے دے رہے ہاں۔ کیو سی جی تگڑے مولویاں تے اثر رکھن والے علما نوں وی ایس پروسس وچ رلتی کرن دا فیصلہ کیتا ہے۔ چیتے رہے پئی افغان طالبان 6 ویں اکٹھ وچ رلتی نہ ہون دا آکھیا سی۔ ملامنصور دے ڈرون حملے وچ مرن توں پہلاں ایہہ سب گروپ گل بات لئی تیار سن۔ ہن مولویاں تے علماں نوں آکھیا جا سی پئی اوہ طالبان نوں گل بات دی میز تے لیاون۔ 6 ویں اکٹھ وچ رلت پاروں افغان طالبان دا آکھنا سی پئی پہلاں امریکہ افغانستان نوں نکلے۔ پئی مئی 2016 تیک تے انہاں دا ایہہ مطالبہ نہیں سی۔ افغان طالبان ایہہ وی آکھیا پئی دوہا (قطر) وچ ساڈے دفتر نوں سیاسی پدر تے سب تسلیم کرن۔ پئی جے اوہ پراسس وچ رلتی ہوکے دفتر نوں منن دی گل کردے تاں گل اگے ودھ جاندی۔ مئی 2016 وچ اسلام آباد ہوئے 5 ویں اکٹھ وچ کیو جی سی ایہہ گل کیتی سی پئی سانوں پہلی پدر تے سیاسی حل ول ودھنا چاہیدا ہے۔ پر اینج جاپدا ہے پئی ٹرمپ دی افغان پالیسی پاروں ہن سیاسی حل دے نال نال ہی فوجی حل تے وی کم ہوسی۔ چین تے پاکستان امن گل بات نوں مڑ چالو کرن بارے لگے ہوئے نیں پر ٹرمپ اتے امریکہ ولوں کجھ طاقتاں فوجی کاروائیاں نوں ہی حل سمجھدے نیں۔ہورے اوہ خطہ وچ اگ نوں ودھاناں چاہندے نیں؟ گل بات دے اگلے دیہاڑ ترے ڈرون حملے ہوئے اتے انہاں وچ 31 بندے مارے گئے جیہناں وچ ات گرداں دا وڈا لیڈر خالد عمرخراسانی وی رلتی سی۔ دوجے پاسے افغانستان وچ خودکش حملے ودھ گئے نیں اتے اج اک ہور خود کش حملہ قندھار ہویا جس پاروں سٹھ افغان فوجی مارے گئے۔ امن گل بات شروع ہوندے ہی مار دھاڑ ودھ گئی جس پاروں سمجھ آندی ہے پئی امن دا راہ بہوں اوکھا ہے۔ کجھ طاقتاں نوں تے امن دے پروسس وچ چین دی رلت دے وی اعتراض نیں۔ پاکستانی میڈیا وچ کیو سی جی اکٹھ بارے خموشی بہوں اہمیتاں رکھدی ہے۔