کراچی : کون کس نوں چونا لا رہیا ؟عدالت توں سیاستاں تیک ڈرامے اتے طافا

لاہور(مانیٹرنگ رپورٹ)ہک ملک کئی ڈرامے،ہر ڈرامے دا کھرا،سٹیبلشمنٹ ول کہ عدالت توں ایم کیو ایم اتے اسلام آباد تے کراچی تیک دہری پالیسیاں، ڈبل سٹینڈرڈ، کوڑ بیانیے،مداخلتاں اوس کنفیوژن دا لشکارا جس دی نشانیاں تھاں تھاں نظر آندیاں نیں۔ہر فیصلے دا نتیجہ سٹیبلشمنٹ دی مرضیاں نال نہیں نکل سکدا پئی ایس نوں ہن من لینا چاہیدا ہے۔
کیہہ جو کجھ ایم کیو ایم اتے فاروق ستارکل کیتا اتے الٹ بازیاں لائیاں اوہ لہو گرم رکھن دا اک بہانہ ہے؟ کیہہ ایہہ پارٹی اتے کراچی دا بیرومیٹر چیک کرن دی مشقاں دا حصہ سی؟پر ایہہ الٹ بازیاں نرے کراچی دا مقدر نہیں کہ لوک عمران، ترین نااہلیاں کیس نوں وی سن رہے نیں اتے نیب دی پھرتیاں وی ویہندے پئے نیں۔عدالت نہ تے مشرف بارے کجھ کر سکی اتے نہ اوس وڈے ادارے خلاف جس ڈاکٹر عاصم نوں پھڑن تے بڑے دعوے کیتے سن؟ کراچی دی الٹ بازیاں پاروں طافے نوں ہشیاریاں ملیاں اتے بی بی سی طافے دے بیان نوں چھاپیا۔عدالت حدیبیہ کیس چکن نال ایہہ دس دتا پئی سینیٹ دی چوناں توں پہلاں کجھ نہ کجھ کرن لئی سب تیاریاں نیں۔لڑائیاں جس شکل وچ اگے ودھ رہیاں نیں اوس نال ریاست دا گند باہر نکلن ول گل ودھ رہی ہے۔ملتان بار دے وکیل لیڈر دس دتا سی پئی انصافی جن دی ’’جان‘‘ کتھے ہور ہے۔ایہہ لڑائیاں طافیاں نوں مڑ کھڑا ہون دی تھاواں دین گیاں کہ ضیا دور وچ وی نری پی پی پی نوں نکرے لاون لئی ریاست بہوں گند ودھایا سی۔کراچی دا ٹریلر دس رہیا ہے پئی کوئی پچھے ہٹن لئی تیار نہیں تے جے تیار وی ہویا تاں ستاری الٹ بازیاں ہی لا سی۔ ہن لڑائی وڈی ہو رہی ہے۔