آئی بی کیس: کیہہ عدالت سن سکدی سی؟ ایہہ نویں ریت؟ لڑدے ادارے

لاہور(مانیٹرنگ رپورٹ)جے کوئی نکا عدالتی اہلکار کل نوں کسے ایجنسی وچ اپنے وڈے افسراں بارے درخاست پائے تاں انہاں نوں تقتیشاں شروع کر دینی چاہیدیاں نیں؟ ایہہ ریت باقی اداریاں وچ وی چلے گی تے ہوئے گا کیہہ؟ خبراں وچ دسیا گیا ہے پئی پاکستان دے سول انٹیلی جنس ادارے انٹیلی جنس بیورو( آئی بی) نے اپنے خلاف اسلام آباد ہائی کورٹ وچ دائر درخاست وچ اپنا جواب دائر کرادتا ہے جس وچ دسیا گیا ہے کہ محکمے دے سارے عہدیداراں دے ناواں نوں خفیہ رکھیا جاندا ہے۔ کسی وی خفیہ ادارے وانگ آئی بی دے سارے ٹیچے تے آپریشنز انتہائی خفیہ ہوندے نیں۔ انٹیلی جنس بیورو آف پاکستان دے اک جونیئر آفیسر انسپکٹر ملک مختار احمد شہزاد نے ادارے دے بہوں سارے اافسراں تے اہلکاراں دے ملک دشمن خفیہ اداریاں دے نال رابطیاں دا انکشاف کردے ہوئے اسلام آباد ہائی کورٹ وچ درخاست دتی سی۔ اسلام آباد ہائی کورٹ دے جسٹس شوکت عزیز صدیقی دی عدالت وچ داخل جواب وچ آئی بی نے موقف اختیار کیتا ہے پئی آئی بی نوں ڈویژن نوٹیفائی نہیں کیتا گیا۔ مزید برآں آئی بی وفاقی پدر تے ڈویژن دا درجہ رکھدا ہے۔ آئی بی فیڈرل لیجسلیٹو لسٹ دا حصہ ہے جو پاکستان دی سکیورٹی نال جڑیا ہے، درخاست گزار ولوں درخاست دے نال لائی جان والی اضافی دستاویزاں سروس رولز دی خلاف ورزی ہے۔ ادارے دا کوئی وی ملازم اطلاعاواں تے مشتمل رپورٹ دی کاپی رکھن دا مجاز نہیں۔ جواب وچ آکھیا گیا کہ درخاست گزار نے اپنی تعیناتی توں لے کے ہن تک ادارے دے خلاف مختلف نوعیت دے 14 مقدمات درج کروائے نیں۔ ایس کیس وچ درخاست گزارنے خفیہ آریشنز تے اہداف توں متعلق پچھیا ہے۔ آئی بی دے سارے اہداف تے آپریشنز انتہائی خفیہ ہوندے نیں۔ جواب وچ دسیا ہے کہ آئی بی لئی مختص بجٹ دی تفصیلاں سالانہ بجٹ وچ شائع نہیں ہوندیاں۔ درخاست گزار نے اپنی درخاست وچ ایہہ الزام وی عائد کیتا ہے کہ انٹیلی جنس بیورو پاکستان وچ تعینات بعض افسراں تے اہلکاراں دے شام، ایران، بھارت، افغانستان تے ازبکستان دے خفیہ اداریاں نال تعلقات نیں جیہناں دے خلاف ٹھوس شواہد موجود نیں۔ تاہم حکام انہاں اہلکاراں دے خلاف کاروائی وچ رکاوٹ نیں۔ یاد رہے کہ اسلام آباد ہائی کورٹ وچ انٹیلی جنس بیورو دے اہلکار نے الزام عائد کیتا سی کہ ایس دے سینئر افسر اں دے مختلف بین الاقوامی دہشت گرد تنظیماں نال رابطے نیں تے ایس نے جداں ایس حوالے نال اعلیٰ افسراں نوں آگاہ کیتا تے انہاں نے ایس تے کن نہ دھریا سگوں الٹا ایس نوں دھمکی آمیز پیغامات موصول ہون لگ پئے۔ایہہ اک نویں ریت پئے رہی ہے جیہڑی اگے ودھی تے کم ہور چوڑ ہو سی۔