رجسٹریشن ملی مسلم لیگ دی: پیشی11 اکتوبر نوں۔ انہاں دا سہولت کار کون ہے؟

لاہور(مانیٹرنگ رپورٹ)مسلہ قنون دا وی ہے کہ تنظیماں تے پابندیاں لاون نوں مذاق نہ سمجھیا جائے۔جنج پابندیاں لگدیاں نیں اوہ طریقہ ہور سوال چکدا ہے۔پارلیمنٹ دی قومی سلامتی کمیٹی وچ پوری بحثاں کرنیاں چاہیدیاں نیں اتے پابندی دی وجوہات وی پبلک کرنی چاہیدیاں نیں اتے نالوں نال انہاں بندیاں نوں وی قنون پاروں سیاسی، سماجی کماں توں پراں رکھنا لوڑی دا ہے۔جداں بھٹو دور وچ سپریم کورٹ نیشنل عوامی پارٹی(ولی گروپ) تے پابندی لائی سی تے ولی خان سنے بہوں سارے عہدیداراں تے پنج، پنج سال سیاست کرن تے پابندیاں سن۔جداں مذہبی جماعتاں تے پابندیاں لگیاں تے لیڈراں تے پابندیاں نہیں لگیاں۔ حد تے ایہہ ہے اک وزیراعظم تے اقامے پاروں ساری عمر لئی پابندیاں لاون نال انہاں پابندیاں دا ہور مذاق بن چکیا ہے۔ریاست دے کارویہار نوں اینج نہیں چلانا چاہیدا کہ لوک ایس نوں باندر ہتھ استرے نال جوڑن۔ایہہ ویکھنا وی لوڑی دا ہے پئی بین جتھے بندیاں دا نیٹ ورک کیہہ سی اتے کیہہ پابندیاں بعدوں اوہ نیٹ ورک ٹٹے نیں؟مسلہ انہاں تے مستقل پابندیاں دا نہیں سگوں انہاں نوں آئین تے قنون پاروں کم کرن ول لیانا ہے۔جے قنون تے طریقہ کار وچ گھاٹے نیں تے پارلیمنٹ ایس تے جھات پائے۔
اسلام آباد پاکستان الیکشن کمیشن دے اک عہدیدار نے آکھیا ہے کہ نویں پنگرن والی سیاسی جماعت ملی مسلم لیگ نوں رجسٹر کرن یا نہ کرن دے معاملے دی پیشی ا لیکشن کمیشن اگے11 اکتوبر نوں ہو سی۔ ناں ظاہر نہ کرن دی شرط تے جمعے نوں وائس آف امریکہ نال گل بات کردے ہوئے دسیا گیا ہے پئی ایس معاملے تے الیکشن کمیشن 11 اکتوبر نوں فیصلے کر سکدا ہے۔عہدیدار نے آکھیا کہ ایس معاملے نوں اک کالعدم تنظیم دی حمایت حاصل ہے۔ چیتے رہے کہ رواں سال اگست وچ جماعت الدعوۃ نے ملی مسلم لیگ بنان دا اعلان کیتا سی جس دے بعد اندرون و بیرون ملک بعض حلقیاں ولوں ایس نویں جماعت توں متعلق تحفظات دا اظہار کیتا جارہیا سی۔ الیکشن کمیشن دے عہدیدار نے دسیا کہ ملی مسلم لیگ نوں تاحال رجسٹرڈ نہیں کیتا گیا تے ایس بارے وچ حتمی فیصلہ قنون دے مطابق الیکشن کمیشن نوں ہی کرنا ہے۔ ملی مسلم لیگ نوں رجسٹرڈ نہ کرن توں متعلق وزارت داخلہ دی سفارش توں پہلے بعض وزرا دے ایسے بیانات وی سامنے آ چکے نیں کہ پاکستان نوں پہلے اپنا گھر ٹھیک کرنا ہے۔ آکھیا جا رہیا ہے پئی انہاں بیاناں نوں ملک وچ سرگرم شدت پسند گروپاں توں متعلق پاکستان دی پالیسی وچ تبدیلی دا اشارہ سمجھیا جائے۔ ایسے ہفتے امریکہ دے دورے دے دوران ایشیا سوسائٹی نیویارک وچ اک تقریب دے دوران پاکستان دے وزیر خارجہ خواجہ آصف نے حافظ سعید، لشکر طیبہ تے حقانی نیٹ ورک نوں پاکستان لئی بوجھ قرار دیندے ہوئے آکھیا سی کہ انہاں نال خلاصی لئی وقت چاہیدا ہے۔ حافظ سعید، جماعت الدعوۃ تے فلاح انسانیت فاؤنڈیشن دے سربراہ نیں اتے انہاں جتھے بندیاں نوں اقوام متحدہ دی سلامتی کونسل تے امریکہ دہشت گرد تنظیماں قرار دے کے پابندی لاچکے نیں۔ حال ہی وچ لہور توں قومی اسمبلی دے حلقے این اے 120 وچ ہون والے ضمنی انتخاب لئی جماعت الدعوۃ دے حمایت یافتہ امیدوار نوں انتخابی نشان جاری کرن تے پاکستان دے ایوان بالا دی قائمہ کمیٹی برائے پارلیمانی امور نے تشویشاں ریکارڈ کروائیاں سن۔ بھارت دا الزام ہے کہ 2008 وچ ممبئی وچ ہون والا حملہ لشکر طیبہ نے کیتا سی جس دے بانی حافظ سعید نیں جو ہن جماعت الدعوۃ دے سربراہ نیں۔ حافظ سعید ایس دی تردید کردے نیں۔ لشکر طیبہ تے حافظ سعید نوں امریکہ دہشت گرد قرار دے چکیا ہے تے انہاں دی گرفتاری وچ مدد دین لئی اک کڑوڑ ڈالر دا انعام وی مقرر کر رکھیا ہے۔