اخیر فنڈنگ دی تفصیلاں دے چھڈیاں ۔ہن 25 توں پہلاں معافی نامہ آسکدا ہے

لاہور (مانیٹرنگ رپورٹ)فینڈنگ دی تفصیلاں تے دے چھڈیاں ہن پتہ چل جا سی ایہہ ٹھیک نیں یا نہیں۔ہن امیداں کیتیاں جاسکدیاں نیں پئی خان ہوری توہین عدالت کیس وچ وی معافی نامہ دے دین گے۔الیکشن کمیشن وچ پی ٹی آئی پارٹی فنڈنگ کیس دی پیشی تے پارٹی رہنما نعیم الحق تے تحریک انصاف دے سیکرٹری فنانس اظہر طارق وی موجود سن۔ سماعت دے دوران تحریک انصاف دے وکیل نے پارٹی نوں ملن والے چندے دی تفصیلاں الیکشن کمیشن وچ جمع کرادتے۔ 5 جلداں تے مشتمل تفصیلاں وچ 2010 توں 2017 تک ملن والے چندے دا ریکارڈ ہے۔ چیف الیکشن کمشنر نے تفصیلاں دی رسید منگن تے پی ٹی آئی دے وکیل ثقلین حیدر نوں جھڑکاں دتیاں۔ چیف الیکشن کمشنر نے غصے وچ آکے جواب دتا کہ کیہ اسی ایتھے کوئی آڑھتی بیٹھے ہاں؟ ایہہ ریکارڈ جمع کرانا ساڈی ذمہ واری سی یا تہاڈی؟ تسی سانوں ریکارڈ جمع کران دے پابند ہو، ایس دی کوئی رسید نہیں ملے گی۔ جس تے پی ٹی آئی دے وکیل فیصل چوہدری نے چیف الیکشن کمشنر توں معذرت کرلتی۔ پی ٹی آئی دے وکیل دی الیکشن کمیشن توں اکاؤنٹس دی تفصیلاں مخالف دھڑے نوں نہ دین دی درخاست کیتی جس تے چیف الیکشن کمشنر نے آکھیا کہ لاہور ہائی کورٹ دی رولنگ ہے کہ ویب سائیٹ تے اثاثیاں دی تفصیلاں شائع ہونی چاہیدیاں نیں۔ اسی تے پچھلے دناں وچ بہوں سارے لوکاں نے اثاثیاں دی نقول حاصل کیتیاں نیں۔ چیف الیکشن کمشنر نے پی ٹی آئی نوں ہدایت کیتی کہ پارٹی ولوں مجاذ نمائندہ متعلقہ افسراں دے نال بیٹھ کے دستاویزاں دی تصدیقاں کرے۔ چیف الیکشن کمشنر نے دوبارہ استفسار کیتا کہ اسلام آباد ہائیکورٹ وچ ایہہ کیس ہن کدوں لگا ہے جس تے فیصل چوہدری نے آکھیا کہ اسلام آباد ہائی کورٹ وچ 10 اکتوبر نوں سماعت ہے ایس لئی ایتھے سماعت دی تریخ 15 اکتوبر مقرر کیتی جائے جس تے کیس دی مزید سماعت 16 اکتوبر تک ملتوی کردتی گئی۔