ننکانہ صاحب(مانیٹرنگ رپورٹ)پاکستان وچ رہن والے سکھاں اج ننکانہ صاحب وچ ”ساکا“ دا دیہاڑ منارہے نیں۔ ایہہ دیہاڑ 21 فروری 1921 دے قتلام خلاف اک یادگاری دیہاڑ دے حوالے نال منایا جاندا ہے۔ 1915 وچ پنجاب دے سکھاں نیں گردواریاں دا بندوبست ہندومہنتاں توں اپنے ہتھ لین دی مہماں شروع کیتیاں سن۔ 1925 نوں ایہہ مہماں اودوں توڑ چڑھیاں سن جداں انگریزاں گوردوارہ ایکٹ پاس ہون دتا سی۔ 21 فروری 1921 نوں یعنی اج توں 96 ورہے پہلاں ننکانہ صاحب دے گردوارے جنم استھان دا قبضہ لین دا ویلہ آیا سی۔ پاکستان گردوارہ پربندھ کمیٹی دے جنرل سیکٹری گوپال سنگھ چاولہ دسیا پئی 1921 وچ بھائی لشمن سنگھ دی قیادتاں وچ سکھاں دا وڈا جتھہ مہنت نال گل بات کرن ننکانہ آیا سی تاں انگریزاں نال مل کے مہنت نے 200 سکھاں نوں درختاں نال لٹکا کے پھاہے چڑھا ماریا سی۔ اساں اج اوس دیہاڑ نوں مناون لئی ایتھے رل رہے ہاں۔ ایس موقعہ تے دعا وی کروائی گئی۔