13 اپریل تے ویساکھی: اک قدیمی پنجابی دیہاڑ، بدھا توں جلیا نوالہ باغ قتلام تیک

لا ہور (مانیٹرنگ رپورٹ)ایہہ تہوار فصلاں نال جڑیا اک سیکولر دیہاڑ ہے جس نوں واڈیاں نال ہر کوئی جوڑدا ہے۔ جداں دی ایس خطے وچ کھیتی باڑی شروع ہوئی ایس تہوارنوں اڈا ہی قدیمی آکھیا جاسکدا ہے۔ ملٹی کلچرل انسائیکلو پیڈیا دے کھوجیاں ایس دی تریخ مڈھ قدیم توں لکھی ہے پر اج کل ایس نوں اک دھرم نال جوڑ کے ویکھیا جاندا ہے۔ کسے زمانے وچ پنجابی مہینیاں وچ ویساکھ ہی پہلا مہینہ ہوندا سی اتے ایہہ ایس لئی وی بہوں اہمتیاں رکھدا سی کہ گوتم بدھ دے جم دا مہینہ وی ویساکھ۔ ویساکھ دی اہمتیاں سکھ دھرم نال کجھ سوسال پہلاں جڑیاں اتے انہاں وی ویساکھی وچ آپدا رنگ پایا۔ ویساکھی دے دیہاڑ دا خیری وڈا حوالہ جلیا نوالہ باغ قتلام جیہڑا مہذب انگریزاں پنجاب دے شہر امرتسر وچ نہتے پنجابیاں خلاف دن دھاڑے گولیاں مار کے کیتا۔ اک دیہاڑ تے حوالے وادھو پر اساں انہاں دا کیہ کریے جیہڑے ایس نوں نرا سکھ دھرم دی عینک نال ہی ویکھدے نیں۔ ویساکھی دا میلہ دھرتی نال جڑیا ہے اتے تاں مارے بہوں سارے لوکاں نوں بسنت، ویساکھی جہے دیہاڑ وارا نہیں کھاندے کیونجے انہاں دے اسلامی بیانیے وچ ایہہ دیہاڑ فٹ نہیں آندے۔