فرانس 24(مانیٹرنگ رپورٹ)ویسے تے پاکستان جیسے ملکاں وچ جے کوئی کھوج لائے تے وادھو کہانیاں سامنے آون گیاں۔ات گردیاں مگر کیہہ کیہہ لکیا ہویا ہے ایس بارے ہلے گل ہونی شروع نہیں ہوئی۔کجھ دن پہلاں بی بی سی اک ویڈیو ڈاکومنٹری جاری کیتی جس وچ کرائے تے احتجاجی دین والے گروہاں دا ذکر وادھو سی۔ات گردیاں پاروں جعلی زخمی دی نویں کہانی فرانس وچ سامنے آئی ہے۔ساڈا میڈیا اجہی خبراں نوں کیوں سامنے نہیں لیاندا، ایہہ اپنی تھاں وڈا سوال۔نومبر2015 وچ پیرس وچ ات گردی دا وڈا وقوعہ ہویا سی جس وچ90بندے مرے سن۔ایس وقوعے

بعدوں اک29 سالہ سیڈرک رے ہوراں فرانس دے وڈے وڈے چینلاں، ریڈیو اتے میڈیا تے رولا پا دتا اتے ایہو دسیا پئی اوہ اکھاں نال سب ویکھیا ہے اتے ایس وچ زخمی وی ہویا۔اوس کولوں اک غلطی ہو گئی سی جس پاروں اوہ دھریا گیا۔اوہ زخمیاں نون ملن والی لمیری رقماں لینا چاہندا سی ،ہورے تاں مارے اوس پورا ڈرامہ رچایا اتے ات گرد اسلامی جہادی بارے میڈیا تے ترے ترے گھنٹے کہانیاں سناندا رہیا اتے اینکر اوس توں ودھ ودھ سوال کردے۔ بس اک انٹرویو وچ اوس دسیا پئی جداں وقوعے ویلے اوہ ہک زخمی نوں چک رہیا سی تے اک بندہ(اسلامی جہادی) کلاشنکوف نال اوس نوں مارن ودھیا۔ پچھوں اک زنانی دوردی آئی تے گولی اوس نوں لگ گئی۔ اپنی گل نوں پکیاں کرن لئی اوس آکھیا پئی اوہ زنانی ڈھڈ نال سی۔ایہہ فروری2016 دی گل ہے جداں اوہ فرانسیسی میڈیا دے ادارے لبریشن نوں انٹرویو دے رہیا سی۔اوس زخمیاں نوں ملن والی رقماں لین لئی اپنا ناں وی لکھویا ہویا سی۔ہورے کجھ میڈیا والے وی ایس وچ حصہ دار ہون، پر ایس بارے میڈیا کجھ نہیں بولے گا۔کھوجی اداریاں سب مرن والیاں دا ریکارڈ چیک کیتا تے اوس وچ مرن والی کوئی زنانی ڈھڈ نال نہیں سی۔ایس انٹرویو بعدوں کھوجی اداریاں سیڈرک بارے کھوج ودھا دتی۔اوس دے فون اتے دوجی کھوجی گلاں بعدوں ایہہ پتہ چلیا پئی اوہ وقوعے ویلے اوس تھاں توں پورے 30کلو میٹر دور سی اتے اوس زکمی ہون دا وی ناٹک کرن لئی پورا بندوبست کیتا سی۔ہن سیڈرک ہوری تے کیس چل رہیا ہے پئی انہاں جھوٹ بولیا ہے۔حیران نہ ہونا پئی ات گردیاں بعدوں بہوں لوکاں نویں کاروبار بنائے نیں اتے ایس وچ ایجنسیاں تے میڈیا وچوں ہرکارے رلتی نیں۔مرن والیاں تے زخمیاں نوں جیہڑی رقماں ملدیاں نیں انہاں لسٹاں وچ جعلی ناں واڑے جاندے نیں اتے رقماں کمایاں جاندیاں نیں۔جداں میڈیا کسی وقوعے نوں ودھا چڑھا کے پیش کریندا ہے تاں اوس بارے غور کرنا لوڑی دا ہے۔