جے آئی ٹی دوہا اپڑ گئی، پر گل اوتھے ہی؟ اخیر مسئلہ کیہہ ہے؟

لاہور (مانیٹرنگ رپورٹ)جداں ایہہ گل آکھ دتی گئی سی اتے میڈیا وی تواتر نال رپورٹ کیتا سی کہ قطری پرنس سفارتخانے نہیں آنا تاں فیر ایس نوں مسئلہ کیوں بنایا جارہیا ہے؟جیو دے پروگرام کیپیٹل ٹاک وچ اج ایہہ دسیا گیا کہ جے آئی ٹی قطر اپڑ چکی ہے پر سفارتخانے وچ ملاقات نہ ہون تے گل وگڑ رہی ہے۔حلانکہ جیو سمیت سارے میڈیا ایہہ پہلے دسیا سی کہ قطری پرنس اپنے خط وچ ایہہ پہلے ہی دس دتا سی۔کتھے دبئی والیاں ایہہ پٹی نہیں پڑھائی؟ دبئی، سعودی عرب دی اپنی لڑائی ہے قطر نال کہ پاکستان تے ایس وچ نیوٹرل ہے۔ایس ویلے عرباں دے اپنے پنگے چل رہے نیں کہ سانوں اوس توں دور رہنا چاہیدا ہے۔ جے ایہہ مسئلہ بنیا تے ایس دا اثر سفارتی پد رتے پئے سکدا ہے۔کیونجے حالات بہوں خراب نیں، ڈیڈ لین مک چکی ہے تاں جے آئی ٹی نوں پاکستان دی خارجہ وزارت نال گلکر کے جانا چاہیدا سی۔جداں پرنس ہوری سوالاں دے جواب دین نوں تیار نیں تاں ایس نوں نک دا مسئلہ نہیں بنانا چاہیدا سی۔کتھے جے آئی ٹی ایکسٹینشن تے نہیں لینا چاہندی؟ قطری پرنس توں بغیر کہانی پوری نہیں ہوندی تاں ایکسٹینشن لئی ایہہ وڈی وجہ بن سکدی ہے۔ پر اوہ سوچن کہ انہاں حالات وچ مسئلہ سفارتی پدر تے وگڑ نہ جائے۔سعودی عرب تے خش ہی ہوئے گا پر سوال تے پاکستان دی پوزیشن دا ہے اتے یمنی قرارداد تے کھلوتی اسمبلی دی بنائی پالیسی نیوٹرل رہن دا بار بار آکھ چکی ہے۔ہن ایس کم نوں مکانا ہی چاہیدا ہے تانجے دس تریخ نوں رپورٹ عدالت جائے تے ججاں نوں مقدمہ اگے ٹورن وچ کوئی اوکڑ نہ رہے۔ہن پکی خبر تے اوس دیہاڑ ملے گی جداں جے آئی ٹی والے واپس آون گے۔اوس ویلے تیک سب گلاں وادھو نیں۔