آئی جی سندھ کس دے اشاریاں تے چل رہیا ہے؟ واٹس اپ چیک کرو؟ملک دا مذاق؟

کراچی(مانیٹرنگ رپورٹ)آئی جی سندھ, محمد بن قاسم بنن دی کوششاں نہ کرن ۔ پر لگدا ہے انہاں نوں کوئی ہلا شیری ہے؟ مسلہ کجھ وی ہوئے پر ملک دا مذاق تے بن ہی رہیا ہے تے ایس وچ سب رلتی نیں۔

پاکستان نوں مذاق بناون دے بہوں وقوعے پئی کدی 28جولائی ورگا وگاڑ آندا ہے، کدی خارجہ آفس دے دو پردھان اک دوجے نوں غدار آکھدے نیں، ات گرد جلسے کردے نیں،رٹائر جرنیل تے اینکر مافیاٹی وی تے بیٹھ کے چونویں قیادتاں نوں چور آکھدے نیں،رشید اے رضوی تے حامد خان ورگے ججاں نوں گالاں کڈہن والے شیر زمان نوں بچاون تے عدالتی مک مکا کروان وچ پیش ہوندے نیں،مشرف قنون دی حکمرانی دا کھلا مذاق ، پر ٹی وی تے اوس دے انٹرویو چلدے نیں، اپنے ہی ’’ہیریاں‘‘ نوں عدالت سر عام رگیدی ہے، نیب چیرمین نوں چور آکھیا جاندا ہے تے ہن ایہہ آئی جی سندھ دا مسلہ وی اساڈے نکمے ہون دا وڈا لشکارا ہے۔
ہر ادارہ دوجے دے کم وچ دخل دینا اپنا فرض سمجھدا ہے اتے پارلیمنٹ نوں کوئی کجھ نہیں سمجھدا۔کیہہ پلس وچ نرا اک ایماندار ’’ہیرا‘‘ ہی رہ گیا ہے؟عدالت اگے وی چھ ہیرے جے آئی ٹی ویلے لبھے سن اتے منگی جیسے ہیرے بارے جج جو آکھ چکے نیں اوس تے جے آئی ٹی بناون والیاں نوں آپ سوچنا لوڑی دا ہے۔جداں واٹس اپ سٹوری پاروں جے آئی ٹی بارے گل کھل گئی سی تے وڈی عدالت در وٹ لتا سی اتے ایجنڈے پاروں پی پی پی وی حاضریاں لوائیاں سن۔جے آئی ٹی تے عدالتاں دی ایجنڈے پاروں دن رات تعریفاں کرن والی پی پی پی ہن کس منہ نال سندھ ہائی کورٹ دی مداخلتاں بارے بولے۔ پر ایس سب نال پاکستان دا مذاق اڈ رہیا ہے اتے ایس وچ سب رلتی نیں۔