شوشہ یا لکواں ویر؟اسمبلی وچ مسئلہ چکاں گے۔عمران خان

لاہور(مانیٹرنگ رپورٹ)اپنے تازے بیان وچ عمران خان آکھیا ہے پئی پارلیمانی پارٹیاں رل مل ایہہ فیصلہ کیتا سی کہ پاکستان مڈل ایسٹ دے پنگیاں وچ نیوٹرل رہے گا۔ پر ہن سابقہ آرمی چیف دی نوکری پاروں ساڈا سٹینڈ بدل جائے گا۔ پاکستان تے ایران دے تعلق خراب ہون گے سگوں ملک وچ فرقہ وارانہ سیاست نوں وی ٹیک لگے گی۔ سعودی مدد نال بنائے گئے ایس فوجی اتحاد نوں عمران خان سنی اتحاد آکھ رہے نیں پر ایہہ اتحاد 2015 وچ بنایا گیا سی تے خان صاحب اک وار وی ایس خلاف بیان نہیں دتا۔ایہہ بیان سعودی عرب خلاف ہے، راحیل شریف خلاف یا ایس دی آڑ وچ (ن) لیگ تے حملہ، ایس بارے مختلف خیال نیں۔ پی ٹی آئی دے بلارے فواد چوہدری تے ایس توں وی اگے ودھ گئے اتے انہاں آکھیا پئی راحیل شریف دے فیصلے نال پاک اوس تے پاک ترکی تعلقات تے وی اثر پئے سکدا ہے۔ عمران خان دسیا ہے پئی اساں ترے رکنی کمیٹی بنادتی ہے جیہڑی ایس مسئلہ نوں اسمبلی وچ اٹھان لئی کم کرے گی۔ ایس کمیٹی وچ شریں مزاری وی نیں جیہڑی عسکری قوتاں دے نیڑے رہندیاں نیں۔ انہاں توں علاوہ شاہ محمود قریشی تے شفقت محمود وی ایس وچ رلتی نیں۔ کتھے عمران خان دھرنیاں وچ نواز شریف نوں ہٹاون لئی کم نہ کرن تے راحیل شریف توں بدلہ لینا چاہندے نیں؟ پاکستان وچ کجھ حلقیاں نوں افغانستان دی فکر رہندی ہے تے کجھ نوں ایران دی اتے کجھ سعودی عرب دے غم وچ رڑے جاندے نیں۔ جداں ایرانی صدر دے پاکستانی دورے ویلے عین موقعہ تے کلبھوشن کڈھ کے ایران تے اوس دے صدر نوں شرمندہ کیتا گیا سی اوس ویلے عمران خان الٹ بیان دتے سن۔ ایران مخالف، شیعہ مخالف طالبان بارے خان صاحب دا سٹینڈ وی سب جاندے نیں۔ فیر یاتے ایہہ سیاسی شوشہ ہے یا فیر کوئی لکواں ویر یافیر نویں چیف دے نیڑے ہون دی کوشش؟