پارٹی فنڈنگ دا حساب دین وچ عمران خان 3سال لا دتے۔رقم30لکھ ڈالر ،2آف شور کمپنیاں۔100 گنڈے تے سو۔۔۔۔

لاہور(مانیٹرنگ رپورٹ)ڈر 25 تریخ نوں پیشی دا ہے۔وارنٹ جاری ہو چکے نیں۔کیہہ خان ہوری معافی منگ لین گے؟ ترے سال بعدوں حساب کتاب دے کے کیہہ اوہ عدالت نوں رام کرن دی کوشش کر رہے نیں؟ وڈے وکیل تاں ہی رکھے جاندے نیں پئی مقدمیاں نوں لما کیتا جائے۔ایہہ کم کوئی ہور کرے تے کوڑ اتے جے تحریک انصاف کرے تاں ایہہ اوس دا حق۔ایس مقدمے توں بچن لئی عمران خان عدالتی اختیاراں ہی نوں چیلنج کر دتا سی کہ ایس پاروں کیس لما ہو گیا۔اوہ کیوں کیس لما کر رہے سن؟ پانامہ وچ تے وزیراعظم نواز شریف استثنی وی نہیں ورتیا سی پر عمران الیکشن کمیشن توں دوڑ کیوں رہے نیں۔ایہہ مقدمہ نومبر2014 وچ انہاں دے پارٹی دے لیڈر ہی بنایا سی اتے اوس پی ٹی آئی دے لیڈراں تے غیر ملکی فنڈنگ وچ گھپلیاں دا الزام لایا سی۔جے کوئی مسلہ نہیں سی تے عمران ایس کیس نوں لما کیوں کردے رہے؟ ماملہ دو آف شور کمپنیاں دا وی ہے جیہڑیاں ٹیکس چوری لئی بنائی گیاں اتے 30 لکھ ڈالر دی رقماں دا وی ہے۔عمران خان الیکشن کمیشن خلاف گھپ کیوں پاندے نیں؟انہاں دے اپنے وکیل وی آکھدے نیں پئی جج سردار رضا ایماندار بندے نیں۔جو زبان اوہ الیکشن کمیشن خلاف ورت چکے نیں اوہ ریکارڈ دا حصہ ہے۔