پہلاں نواز شریف فیر عمران نااہل ہونگے۔ خورشید شاہ۔عمران تے نواز وچ مک مکا چل رہیا ہے۔چوہدری منظور

لاہور (مانیٹرنگ رپورٹ)اپوزیش لیڈر خورشید شاہ نے آکھیا ہے کہ نواز شریف تے عمران خان اک ہی سکے دے دو رخ نیں۔ حالات دسدے نیں عمران خان تے نواز شریف دونوں نااہل ہون گے۔ اسلام آباد وچ میڈیا نال گل بات کردے ہوئے خورشید شاہ نے آکھیا کہ دوناں لئی دعا ہی کر سکدا ہاں کہ کسی طراں ایہہ دنوں بچ جان۔ میں نہیں سمجھدا کہ عمران نواز شریف دے بغیر نااہل ہون گے۔ جس طراں مقدمے چل رہے نیں،اینج جاپدا ہے کہ پہلاں وزیراعظم فیر چیئرمین پی ٹی آئی عمران خان نااہل ہون گے۔ انہاں نے آکھیا کہ نواز تے عمران دوناں اک دوجے لئی لازم تے ملزوم نیں تے دوناں دا روح تے جسم والا رشتہ ہے۔ایس توں رلدی ملدی گل کل پی پی پی دے قصوری لیڈر چویدری منظور ہوراں اک ٹی وی شو وچ آکھی سی اتے انہاں کہیا سی کہ ایہہ سب کھیڈ تماشہ ہے اتے نواز تے عمران وچ مک مکا چل رہیا ہے کیونجے دوناں اک دوجے دی گارنٹی نیں۔کدی خان ہوری پی پی پی تے مسلم لیگ(ن) لئی مک مکا دی ٹرم ورتدے سن فیر کجھ دیر لئی پی پی پی تے عمران وچ مک مکا ہو وی گیا اتے ہن ایہو الزام نواز تے عمران تے ہے۔2018دی چوناں وچ لوک آپ فیصلہ دے دین گے کہ کون کڈے پانی وچ ہے۔مئی 2006دے جمہوری میثاق بعدوں ایہہ مک مکا دی ٹرم گھڑی گئی سی اتے ایس دا ٹیچا ایس جمہوری میثاق نوں مذاق بنانا سی۔خان ہوراں نوں ایہہ سوٹ وی کردا سی تاں ایجنڈیاں وچ ایجنڈے رل مل گئے سن اتے میڈیا وی ایس نوں بہوں چکیا سی۔جے ایہہ مک مکا سی تے میگنا کارٹا وی مک مکا سی۔ پر انہاں میگنا کارٹا نوں ہولے ہولے آڈر آف دا ڈے بنا لتا پر ساڈے ایتھے اجہے گرہ وادھو جیہڑے جمہوری بندوبست وچ مداخلتاں نوں ”ایمان“ دا حصہ سمجھدے نیں اتے ایہہ مداخلت کوئی ادارہ وی کرے انہاں نوں ایس توں کوئی غرض نہیں۔پر اج پاکستان وچ انتشار کس نوں وارا کھاندا ہے ایہہ کوئی پہیلی نہیں رہ گئی۔شاہ ہوراں دی دعا قبولی جا سی۔