اسلام آباد(ویب ڈیسک)اسلامی فوجی اتحاد میں شامل ممالک کا اہم اجلاس آئندہ ماہ متوقع ہے تاہم اجلاس کی حتمی تاریخ اتحادی ممالک کی مشاورت سے طے کی جائے گی اوراس اجلاس کاانعقاد سعودی عرب میں متوقع ہے۔

حکومتی ذرائع سے معلوم ہوا ہے۔ اسلامی ممالک کے فوجی اتحاد کے پہلے اجلاس میں اتحاد کے قواعدوضوابط،فوجیوں کی تعیناتی، ہیڈکوارٹر کے مقام ،فوجی اڈوں کی تعمیر،بری ،بحری اور فضائی افواج کی تعیناتی جیسے معاملات پر مشاورت کی جائے گی۔ذرائع کا کہنا تھا وفاق میں اعلیٰ سطح پر تفصیلی مشاورت کے بعد وفاق نے اپنی پالیسی واضح کردی ہے پاکستان اس فوجی اتحاد کا حصہ تو ہوگا اوردہشت گردی کے خاتمے کیلئے ہر ممکن تعاون بھی کرے گا تاہم اس اتحاد کی جانب سے اگر کسی اسلامی ملک کے خلاف فوجی کارروائی کی گئی تو اس ایکشن میں پاکستان میں شامل نہیں ہوگا اور نہ ہی کوئی تعاون کرے گا