بھارت اتے انتہا پسندیاں: ہندو انتہا پسندی خلاف لڑن والی صحافی قتل۔ نامعلوم افراد تے عدالت دا بھیڑا کردار؟

لاہور(مانیٹرنگ رپورٹ)اک ہندو قوم پرست لکھیا پئی اک کتی، کتے دی موت ماری گئی اتے کتورے بھونک رہے نیں۔پاکستان، بنگلہ دیش تے بھارت وچ بنیاد پرست اکثر اجہی گندی زبان ورتدے نیں۔لوکاں تے الزام لانا انہاں دی پرانی بماری ہے۔مرن والی صحافی بنیاد پرستی تے قوم پرستی دے خلاف سی تاں مارے اوس نوں کدی کنجری تے کدی رب دی ویری لکھیا گیا۔ایہہ سب اک کھیڈ ہے۔ عدالتاں جداں بنیاد پرستاں نوں خش کرن لئی نکمے فیصلے کردیاں نیں تے انہاں تے کس دا پریشر ہوندا ہے؟ نامعلوم افراد، عدالت، موٹر سائیکل تے ات گرداں دا سانگا ہر پاسے تگڑا ہے۔ خبر وچ دسیا گیا ہے پئی کرناٹک دے شہر بنگلورو وچ نامعلوم افراد نے 55 سالہ صحافی گوری لنکیش نوں گولی مار کے قتل کردتا۔ گوری لنکیش کھبے پکھ نال سانجھ رکھن والی مشہور صحافی تے کرناٹک دی مادری زبان دے ہفتہ روزہ اخبار ’’لنکیشن پتریکا‘‘ دی ایڈیٹر سی۔ایہہ اخبار اوس دا پیو چلاندا سی اتے اوس دے مرن بعد ایہہ ایس نوں چلا رہی سی۔ اوہ بھارت وچ ودھدی انتہا پسندی دے خلاف وی سرگرم عمل سی۔ پلس نوں بنگلورو وچ گوری دے گھر دے باہر خون وچ لت پت انہاں دی لاش ملی۔ پلس دے مطابق گوری پچھلے رات دفتر توں گھر واپس آئی تے گڈی توں اتر کے گھر وچ داخل ہورہی سی کہ نامعلوم موٹر سائیکل سوار حملہ آور انہاں تے فائرنگ کرکے فرار ہوگئے۔ گوری نوں سینے تے سر وچ گولیاں لگیاں۔ وزیراعلیٰ کرناٹک نے گوری دے قتل نوں جمہوریت دا قتل قرار دتا ہے۔ پچھلے دناں بی جے پی دے رکن پارلیمنٹ اہلاد جوشی نے مضمون شائع کرن تے گوری تے ہتک عزت دا دعوی کیتا سی۔ ایس کیس وچ انہاں نوں عدالت نے چھ مہینے قید دی سزا سنائی سی ۔پر انہاں نے فیصلے دے خلاف اپیل کیتی سی تے ضمانت تے سن۔ گوری دا تعلق معروف خاندان توں سی تے انہاں دے والد شاعر و ادیب اتے ایدیٹرسن جداں کہ فلم ساز کویتا لنکیشن انہاں دی بہن ہے۔ بھارت وچ انسانی حقاں دے کارکناں دے مطابق ہندو انتہا پسند اپنے مظالم دے خلاف آواز چکن والے صحافیاں نوں چن چن کے قتل کررہے نیں۔ ایس توں پہلے معروف اسکالر ایم کلبرگی، انتہا پرستی دے خلاف سرگرم کارکن نریندر دابھولکر تے سیاست دان گووند پانسرے نوں وی قتل کیتا جا چکیا ہے۔صحافیاں دی عالمی جتھے بندی’’سرحداں توں بغیر صحافی‘‘ نے ایس دی مذمتاں کردے ہوئے اک وار فیر بھارت نوں صحافیاں دے حوالے نال خطناک ملک آکھیا ہے۔