ڈی آئی خان(کے پی کے): کڑی نوں سر عام ننگا کیتا۔پلس تماشائی۔وڈا ملزم مفرور

ڈی آئی خان(مانیٹرنگ رپورٹ) خیبر پختونخوا دے ضلع ڈیرہ اسمائیل خان وچ اک جوان کڑی نوں ننگا کر کے پھرایا گیا۔ جداں ایس بارے میڈیا تے کھپ پئی تے اٹھ بندیاں نوں پلس پھڑیچ لتا پر وڈا ملزم سجاول دوڑ گیا یا دوڑا دتا گیا۔بی بی سی ایس بارے رپورٹ چھاپی ہے جس وچ کڑی دی ماں دسیا پئی جداں مینوں پتہ چلیا تے میں اپنے گھر توں باہر دوڑی۔ باہر مسلح بندے کھلوتے سن۔ میں انہاں کولوں اپنی کڑی بارے پچھیا تے انہاں آکھیا کہ اپنے منڈے نوں گھل۔کڑی دی ماں دسیا کہ پلس نے کوئی مدد نہیں کیتی سگوں اوہ تے مقدمہ درج وی نہیں کر رہے سن۔پلس ملزماں نال رلی ہوئی سی پر جداں میڈیا تے خبر چلی تاں پئے بھرتو گئے۔ملزماں ضلعے دے کھڑپینچاں ول دوڑے۔ایہہ وقوعہ27اکتوبر دا ہے۔چار دناں بعد چودھوان تھانے والیاں اٹھ بندے پھڑیچے پر وڈے ملزم سجاول بارے کجھ پتہ نہیں۔انہاں اتح وچوں موقعے تے کون کون سی ایس بارے وی کجھ پتہ نہیں۔ایس کیس دا حال وی مشال قتل کیس ورگا ہو سکدا ہے۔اوس کیس دا وڈا ملزم اتے حکمران پی ٹی آئی دا کونسلر کے پی کے دی ہشیار تے بہترین پلس اج تیک پھڑ نہیں سکی۔پلس دی ہشیار پالیسی پاروں یا تے مقدمے درج ہی نہیں ہوندے یا فیر غلط ملزم پھڑیچ کے کیس کمزور کیتا جاندا ہے۔
جس کڑی نوں ننگا کر کے پنڈ دی گلیاں وچ پھرایا گیا سی اوس بی بی سی نوں دسیا پئی میں اپنی دو مسیراں نال پانی بھر کے واپس آرہی ساں جداں پنڈ دی اک گلی وچ اٹھ، دس منڈیاں ساڈا راہ ڈک لتا۔اک منڈے اگے آ کے مینوں دھکا دتا تے میں ڈگ گئی۔ فیر اوس قینچی نال میرے کپڑے پاڑ دتے تے مینوں ننگا کر کے گلیاں وچ پھرایا گیا۔مینوں پنڈ دے باہر تیک اینج ہی لے کے گئے اتے فیر اوہ چلے گئے۔
کڑی دے بھرا تے الزام لگیا سی کہ اوس کسی کڑی نوں (جیہڑی ملزماں وچوں اک دی بہن سی)موبائل لے کے دتا سی جس تے دونوں گلاں کردے سن۔مسلہ جرگے تیک گیا تے فیر موبائل دین والے تے ترے لکھ دے جرمانے دی سزا سنائی گئی سی۔ منڈے اوہ رقم ادا کر دتی سی۔ہن رقماں لین والے خاندان دے منڈے بدلہ لین لئی ایہہ سب کیتا۔
اٹھ ملزماں نوں کل عدالت پیش کر دتا ہے کہ مشال قتل کیس وانگ ایتھے وی پلس ملزماں نال رلی لگدی ہے۔پلس تے پلس ہی ہوندی ہے بھانویں کسے وی صوبہ دی ہوئے۔