پاکستان: چینی زبان سکھن والے وادھو۔وائس آف امریکہ

لاہور(مانیٹرنگ رپورٹ) پاکستان دے دارالحکومت اسلام آباد وچ لشکاں ماردی بلڈنگ دے سامنے پردھان چینی فلاسفر کنفیوشس دا اک وڈا چٹا مجسمہ گڈیا ہے۔ کنفیوشس انسٹی ٹیوٹ دے ناں توں معروف ایہہ عمارت نیشنل یونیورسٹی آف مارڈن لینگوجز جس نوں نمل وی آکھیا جاندا ہے، دا اک شعبہ ہے جتھے چینی زبان تے رہتل بارے تعلیم دتی جاندی ہے۔ نمل وچ چینی زبانسکھان دے کم نوں تقریباً 50 سال ہو چکے نیں۔ ایہہ ستمبر 1970 وچ نمل بنن دے نال ہی شروع ہو گیا سی تے ایس وقت ایتھے داخل ہون والے طالب علماں دی تعداد صرف 13 سی جس وچ ہولے ہولے وادھا ہوندا رہیا ہے ۔ ہن انہاں دی تعداد 470 تک اپڑ چکی ہے۔ روزنامہ ڈان وچ شائع ہون والی اک رپورٹ وچ دسیا گیا ہے کہ طالب علماں دی ودھدی ہوئی تعداد دپاروں چین دی حکومت نے 2015 وچ ایس شعبے دے توسیعی پروگرام وچ تعاون کیتا۔ انسٹی ٹیوٹ دے اک لیکچرر ژانگ ڈاؤجیان کہندے نیں کہ ایہہ مرکز پاک چین سانگیاں دی مضبوطی وچ اہم کردار ادا کررہیا ہے۔ شعبے دی اک ہور ٹیچر رشیدہ مصطفی کہندی ہے کہ حالیہ سالاں وچ ایتھے داخلہ لین والیاں دی تعداد تقریباً دو گنا ہوگئی ہے۔ جنہاں چوں 300 طالب علم صبح دی کلاساں وچ تے 160 شام دی کلاساں وچ آندے نیں۔ ڈاؤجیاں نے دسیا کہ چینی زبان دے انسٹی ٹیوٹ وچ مختلف ثقافتی سرگرمیاں کیتاں جاندیاں نیں جنہاں وچ چین ثقافتی میلے وی شامل نیں۔ 2010 وچ انسٹی ٹیوٹ نے چینی زبان دے دو ایف ایم ریڈیوٹیشن وی قائم کیتے جنہاں دی نشریات ایف ایم 104.6 تے ایف ایم 95 تے براڈ کاسٹ کیتیاں جاندیاں نیں۔ انہاں دا کہنا سی کہ پاکستانی طالب علم چین دے علاقے وچ بولی جان والی مینڈرین زبان بہت جلد سیکھ لیندے نیں کیونجے ایس نوں سیکھنا کجھ زیادہ مشکل نہیں ہے۔ عالمی معیشت وچ چین دی گرفت مضبوط ہون توں چینی زبان دی اہمیت تے لوڑ وادھو ہے تے لوکاں وچ چینی زبان سکھن دا رحجان ودھ رہیا ہے۔ کیونجے ایس شعبے وچ روز گار دے مواقع ودھ رہے نیں۔ رشیدہ مصطفی دا کہنا سی کہ پاک چین اقتصادی راہداری یعنی سی پیک چینی زبان تے رہتل ول رحجان وچ اضافے دا اہم سبب ہے۔ سب جاندے نیں پئی ایس دی تکمیل توں پاکستان تے چین وچ زبان جانن والیا لئی مواقع پیدا ہون گے۔ جداں ایہہ انسٹی ٹیوٹ شروع ہویا سی اوس ویلے ایتھے دو کورسز پڑھان جاندے سن جداں کہ ہن انہاں پروگراماں دی تعداد 10 ہے۔ نمل دے اک سابق طالب علم ذیشان محمود نے دسیا کہ انہاں نے 2014 وچ اپنی تعلیم مکمل کیتی جس دے بعد انہاں نے پاکستان وچ کم کرن والی اک چینی کمپنی وچ مترجم دی ملازمت مل گئی۔ چینی زبان سکھن دے رحجان وچ اضافے نال نمل اپنے کنفیورشس انسٹی ٹیوٹ دی شاخاں دوجے شہراں وچ وی قائم کررہیا ہے۔ ایس وقت ملک دے مختلف حصیاں وچ چینی زبان دے چار انسٹی ٹیوٹ کم کررہے نیں جو اسلام آباد، فیصل آباد دی زرعی یونیورسٹی، لاہور دی پنجاب یونیورسٹی تے کراچی یونیورسٹی وچ واقع نیں جداں کہ اک انسٹی ٹیوٹ گلگت وچ زیر تعمیر ہے۔