اج 3نومبر جے۔قنون دی حکمرانی10سال بعد وی اک سفنہ

لاہور(مانیٹرنگ رپورٹ )دس سال پہلے اج دے منحوس دن نوں چوتھے آمر پرویز مشرف نے ریاستی طاقت دا ننگا وار کیتا سی کہ جس نوں اک 7رکنی بینچ روکھن دی کوششاں کیتاں سن پر ریاستی طاقتاں ججاں نوں وی چک لتا سی۔مسلم لیگ(ق) تے ایم کیو ایم توں اڈ سب پارٹیاں مشرف دی ایمرجنسی دے خلاف اک مک ہوگیاں سن۔ایہہ ایمرجنسی مشرف دی حکومت وچ اخیری پھانا ثابت ہویا جس بارے اوہ 2نومبر تیک سوچ وی نہیں سکدا سی۔مشرف چھ اکتوبر 2007وچ وردی وچ مڑ صدر بنیا سی اتے میڈیا نوں کھجل کرن لئی اوس اک کوڑ حکمنامہ جاری کیتا سی جس نوں این آر او آکھیا جاندا ہے۔فرنٹ پی پی پی دا وکھایا گیا سی پر فیدہ ایم کیو ایم نوں دتا گیا سی۔پر بے نظیر بھٹو این آر او نوں نہیں منیندی سی تاں مارے اوہ اٹھارہ اکتوبر نوں مڑ پاکستان آ گئی سی۔مشرف آپ آکھیا سی پئی واپس پاکستان آ کے بے نظیر این آر او توڑ دتا ہے۔پر کوڑ میڈیا اج تیک این آر او دا گھما چلا رہیا ہے۔3 نومبر نوں عدالت تے کھلا حملہ کیتا گیا کہ جس دی مثال پاکستان دی تریخ وچ نہیں ملدی۔مسلہ اوہ کیس سی جیہڑا وردی وچ صدر بنن بارے چل رہیا سی۔ملک وچ افراتفریاں دا راج ہویا کہ نواز شریف، عمران خان تے بے نظیر بھٹو ججاں نال کھلو گئے۔ نرے25دناں بعد مشرف نوں وردی لانی پئے گئی۔اوس اپنے ڈی جی آئی ایس آئی جنرل اشفاق پرویز کیانی نوں نواں آرمی چیف بنانا پیا۔مشرف ججاں وچ پاڑ پا دتاسی اتے ڈوگر کورٹ بن چکے سن۔پر مشرف دا ڈنگ نکل چکیا سی کہ اوس نوں عام چوناں نہ کروان دا فیصلہ وی واپس لینا پیا۔عالمی میڈیا وی ایس لڑائی نوں قنون دی حکمرانی دی لڑائی لکھیا پر اج دس سال بعدوں اساں کتھے کھڑے ہاں ایہہ ہر پاکستانی جاندا ہے۔مشرف اج وی قنون دی حکمرانیاں دا بوتھا چڑا رہیا ہے اتے احتسابی قنون سب لئی نہیں۔ڈوگر کورٹ مک گیا، ڈوگر کورٹ جاری ہے، تساں آپ فیصلہ کرو۔