سینیٹ:بالڑیاں دے ویاہ اتے جادو ٹونے خلاف قنون منظور

لاہور(مانیٹرنگ رپورٹ) اجہے قنون بنادے ہوئے ایس گل دا وی بندوبست کرنا چاہیدا ہے پئی جے کوئی انہاں دا غلط ورتارا کرے اوس نوں وی دھریا جائے۔دوجی گل ایہہ ہے پئی اجہے قنوناں دا لشکارا ساڈی نصابی کتاباں تے وی پینا چاہیدا ہے اتے یونیورسٹیاں نوں انہاں تے تھیسس کروانے لوڑی دے نیں۔
پاکستان دے ایوان بالا یعنی سینیٹ دی قائمہ کمیٹی (داخلہ) نے گھٹ عمری دی شادی تے جادو ٹونوں ڈکن دا بل منظور کرلتا جس پاروں کُڑی دی شادی دی عمر 18 سال کرن دی تجویز دتی گئی ہے۔ اپوزیشن دی سب توں وڈی جماعت پاکستان پیپلز پارٹی دے سینیٹر سحر کامران ولوں پیش کیتے جان والے ایس بل وچ آکھیا گیا ہے کہ گھٹ عمری دی شادی توں نہ صرف بچیاں دے مرن وچ وادھا ہوندا ہے سگوں ایس توں کارو کاری ورگے جرماں ول وی کھرا جاندا ہے۔ ایس توں پہلے قائمہ کمیٹی نے ایس بل نوں زیر بحث لیاندے بغیر ہی مسترد کردتا سی کہ ایہہ بل اسلامی قنوناں دے منافی ہے۔ نامہ نگار شہزاد ملک دے مطابق سینیٹر رحمان ملک دی سربراہی وچ ہون والے ایس اجلاس وچ وزارت مذہبی امور دے حکام نے کمیٹی نوں بریفنگ دیندے ہوئے آکھیا کہ اسلامی نقطہ نظر توں بلوغت دی عمر نوں پہنچن تے کُڑی دی شادی کردتی جائے ۔جس تے اسلامی نظریاتی کونسل دے نمائندے نے آکھیا کہ اک تحقیق دے مطابق 9 سال توں اوتے بلوغت تصور ہوندی ہے۔ قائمہ کمیٹی دی خصوصی دعوت تے بلائے گئے مذہبی سکالر ڈاکٹر منیر نے دسیا کہ اٹھارہ سال توں گھٹ عمر کُڑی نوں گڈی چلان دی اجازت نہیں دیندے تے فیر اوس دی شادی کیوں کردیندے نیں۔ کمیٹی وچ موجود این جی او دے نمائندہ نے آکھیا کہ گھٹ عمری دی شادی توں ماں دی صحت تے منفی اثر پیندے نیں۔ دوجے پاسے وزارت داخلہ توں متعلق سینیٹ دی قائمہ کمیٹی نے ملک بھر وچ جادو ٹونے دی روک تھام، کالے جادو تے پابندی تے جعلی پیراں اتے عاملاں خلاف سخت کاروائی دابل وی منظور کرلتا۔ بل وچ کالا جادو کرن والے شخص نوں گھٹ و گھٹ دو سال تے زیادہ زیادہ ست سال تک سزا تے پنجاہ ہزار روپے توں دولکھ روپے تک جرمانہ کرن دی تجویز دتی گئی۔ بل وچ جادو ٹونے توں متعلق چیزاں رکھن تے تِن مہینے قید تے 25 ہزار روپے جرمانہ تجویز کیتا گیا ہے۔ جداں کہ مسلماناں دی مقدس کتاب قرآن شریف دے جادو ٹونے لئی ورتارے تے عمر قید دی سزا تجویز کیتی گئی ہے۔ ایس بل پاروں دفنان بعدوں قبر کھولن تے پابندی ہوئے گی۔ اجہے مجرم لئی ست سال قید تے اک لکھ روپے جرمانہ دی سزا دی تجویز کیتی گئی ہے۔ ایس بل وچ ایس گل دا ذکر نہیں کیتا گیا کہ جے پوسٹ مارٹم لئی قبر کشائی کروانی پئی تے فیر ایس دا طریقہ کار کیہ ہوئے گا۔ ایس بل وچ مردے دا گوشت کھان تے 14 سال قید سزا تجویز کیتی گئی ہے۔ جداں کہ ایس بل وچ مسمار شدہ قبر وچ کالا جادو کرن تے پابندی ،کسی قبر یا مردے دے اوتے نہان تے پابندی اتے کفن یا تابوت دی چوری تے سزاواں تجویز کیتی گئیاں نیں۔ بل وچ جادو ٹونے توں متعلق اشتہاراں یا لکھت نوں چھاپن اتے کتاباں ویچن یا خریدن تے پابندی ہوئے گی جس دی خلاف ورزی تے اک سال قید تے جرمانہ کیتا جائے گا۔ بل دے تحت جعلی عامل تے جادو ٹونا کرن والے عامل نوں تحفظ دین والے نوں وی سزا تے جرمانہ کیتا جاسکے گا۔ قائمہ کمیٹی نے وزیر داخلہ احسن اقبال تے وزیر مملکت برائے داخلہ طلال چوہدری دی مسلسل غیر حاضری تے انہاں نوں لاپتہ قرار دے دتا۔ کمیٹی دے چیئرمین دا کہنا سی کہ انہاں وچ کسی اک وزیر نوں وی بازیاب کراکے کمیٹی اجلاس وچ پیش کیتا جائے۔