مشال کیس : مردان توں کڈہن لئی پشورہائیکورٹ درخاست۔صوبائی سرکاردا جے آئی ٹی تے پریشر

لاہور(مانیٹرنگ رپورٹ) مردان دا ڈی ایس پی،جرنلزم ڈیپارٹمنٹ دا ہیڈ اتے ضلعی انتظامیہ دے ہرکارے کیس وچ ملوث نیں پر صوبائی سرکار انہاں نوں بچانا چاہندی ہے۔صوفی مشال دے والد محمد اقبال ہوراں نے اپنے پتر دے کیس نوں مردان توں کڈہن لئی درخاست پشور ہائی کورٹ وچ جمع کرادتی جے۔ محمد اقبال خان دے وکیل عبدالطیف آفریدی نے پشور ہائی کورٹ وچ دائر درخاست وچ امن و امان دی صورتحال تے علاقے وچ ملزماں دے اثر و رسوخ نوں بنیاد بناندے ہوئے کیس نوں مردان توں کڈہن دی گل کیتی جے۔ انہاں نے درخاست وچ ایہہ وی دسیا کہ مردان یونیورسٹی وچ مشعال خان دے ہولناک قتل بعدوں اوسے علاقے وچ ایہہ کیس چلاون نال گڑبڑ دے چانس وادھو نیں۔ انہاں عدالت نوں یاد کروایا کہ ملزماں دے دوستاں دی وڈی تعدادا تے کجھ مذہبی جماعتاں والیاں پھڑیچے طالب علماں تے ودجے ملزماں دی رہائیاں دے مطالبے کردے ہوئے سڑکاں تے احتجاج کر رہے نیں۔ درخاست وچ آکھیا گیا کہ تقریباً 57 ملزماں نوں مشعال خان قتل دے الزام وچ گرفتار کیتا گیا ہے جداں کہ کجھ ملزمان مفرور نیں۔پیشی تے ملزماں دی اینی وڈی گنتری وی آندی ہے تے گواہاں تے حامیاں دی وڈی تعداد وی کہ ایس پاروں کسے وی ویلے کم خراب ہو سکدا ہے۔ درخاست وچ مشعال خان دے والد دے حوالے نال دسیا گیا کہ درخاست گزار اک متوسط طبقے دے گھرانے توں تعلق رکھدے نیں جیہناں سیکیورٹی دے حوالے نال مسائل دا سامنا ہے تے ملزم با اثر افراد نیں لہٰذا انہاں نوں ملزمان دے گھر والیاں تے حامیاں ولوں خدشے نیں۔ درخاست وچ ایہہ وی آکھیا گیا کہ ایس کیس دی تحقیقاں مکمل نیں تے انسداد دہشت گردی دی عدالت (اے ٹی سی) دے جج دے سامنے ٹرائل لئی پیش ہونا ہے جداں کہ کیس وچ درجناں افراد دی ضمانتاں وی عدالت وچ جمع کرائی جاچکیاں ہے۔عدالت کیس نوں ہری پور دی اے ٹی سی یا فیر کسی دوجی محفوظ جگہ منتقل کرے۔کجھ دن پہلا ں پیش کیتی جان والی جے آئی ٹی رپورٹ دے مطابق مردان دی عبدالولی خان یونیورسٹی دے طالب علم مشعال خان دا قتل باقاعدہ منصوبہ بندی دے تحت کیتا گیا سی۔ رپورٹ وچ آکھیا گیا کہ پی ایس ایف دے صدر صابر معیار تے یونیورسٹی ملازم نے واقعہ توں اک مہینے پہلے مشعال نوں قتل کرن دی گل کیتی سی۔ایہہ وی جے آئی ٹی وچ آکھیا گیا کہ مخصوص سیاسی گروہ نوں مشعال دی سرگرمیاں توں خطرہ سی۔ اوہ کہیڑا گروہ سی؟ اوس دا نان کیوں نہیں لکھیا؟ دوجے پاسے ٹربیون نال گل کردے ہوئے بشری گوہر دسیا ہے کہ مردان دا ڈی ایس پی،جرنلزم ڈیپارٹمنٹ دا ہیڈ اتے ضلعی انتظامیہ دے ہرکارے کیس وچ ملوث نیں پر صوبائی سرکار انہاں نوں بچانا چاہندی ہے۔انہان ایہہ وہ الزام لایا کہ صوبائی سرکار جماعت اسلامی تے پی ٹی آئی دے بندیاں نوں بچاون لئی اپنا اثر ورت رہی ہے۔ بشری گوہر دی گل اوس ویلے پکی ہوندی ہے جداں پی ٹی آئی دا کونسلر دوڑا دتا جاندا ہے جیہڑا مرکزی کرداراں وچ رلتی ہے۔ایس کیس بارے عمران خان دی خموشی ایہہ دسدی ہے کہ کپتان اپنی سوبائی قیادت اگے وی بے بس جے۔