مشرف غداری کیس: ہر حال وچ پیش ہونا پئے گا، داخلہ وزارت جائیداد دی مکمل رپورٹ دے۔عدالت

اسلام آباد(مانیٹرنگ رپورٹ) سابق صدر مشرف خلاف غداری کیس سنن والی خصوصی عدالت وچ داخلہ وزارت نے مشرف دی جائیداد توں متعلق تفصیلاں جمع کرادتیاں۔ جسٹس یحییٰ آفریدی نے ریمارکس دتے کہ مشرف نوں ہر حال وچ عدالت دے روبرو پیش ہونا ہوئے گا۔ مزید سماعت 18 جولائی تک ملتوی کردتی گئی ہے۔ وزارت داخلہ نے عدالت نوں دسیا کہ آرمی ہاو¿سنگ سکیم وچ مشرف دے گھر توں متعلق رپورٹ ڈائریکٹر ملٹری لینڈ توں ہلے تک نہیں آئی۔ خیابان فیصل کراچی وچ وی جائیداد دے بارے جی ایچ کیو نوں لکھیا ہے تے رپورٹ دی اڈیک ہے۔ چک شہزاد فارم ہاو¿س اسلام آباد واقع جائیداد کمشنر اسلام آباد کنفرم کیتی ہے۔ مشرف دی لہور، گوادر تے کراچی دی جائیداداں دے بارے ہلے رپورٹاں دی اڈیک ہے۔ پرویز مشرف دی وطن واپسی توں متعلق درخاست تے استغاثہ اپنا جواب جمع کرچکیا ہے۔ مشرف نوں وطن واپسی تے فول پروف سکیورٹی دتی جائے گی۔ وکیل اختر شاہ دا وکالت نامہ مشکوک ہے۔ مشرف دے وکیل نے موقف اختیار کیتا کہ سابق صدر دی پاکستان وچ کوئی رہائش گاہ نہیں کیونجے انہاں دی ساریاں جائیداداں قرق ہوچکیا نیں۔ اوہ سکیورٹی مسائل دے باعث پاکستان نہیں آرہے۔ پرویز مشرف دے وکیل نے کیس دے مزید التواءلئی درخاست دے دتی۔ جسٹس یحییٰ آفریدی نے آکھیا ایہہ ویکھنا ہوئے گا کیہ جس عدالت نے مشرف نوں مفرور قرار دتا اوہ وارنٹ معطل وی کرسکدی ہے۔ جائیداد ضبطگی دا حکم معطل نہیں ہوئے گا۔ استغاثہ دے وکیل اکرم شیخ نے آکھیا کہ ٹرائل مکمل ہوگیا ہے۔ ملزم دے 342 دے بیان دی ضرورت نہیں، عدالت ہن فیصلہ کرے۔ استغاثہ شواہد ریکارڈ کروا چکیا ہے۔ جسٹس یاور علی نے آکھیا عدالت 342 دے بیان وچ ملزم توں سوالات کردی ہے۔ اکرم شیخ نے آکھیا پرویز مشرف دے پیش ہون دی بجائے تحریری بیان ہی کافی ہے۔ پرویز مشرف عدالت وچ سرنڈر کرن، سکیورٹی دین گے۔ وزارت داخلہ ولوں ایس دی یقین دہانی کرائی جارہی ہے۔ اک مفرور تے اشتہاری شرائط نہیں رکھ سکدا۔ حکومت دی کوئی بدنیتی نہیں۔ جسٹس یحییٰ آفریدی نے استفار کیتا کہ پراسیکیوٹر اکرم شیخ دی تقرری دے خلاف معاملے تے عدالت دا کیہ اختیار ہے؟ قنون دے تحت پراسیکیوٹر دی تعیناتی دے خلاف آپ متعلقہ فورم تے جان۔ درخاست گزار شاہد اور کزئی نے آکھیا اکرم شیخ وزیراعظم دے دوست نیں۔ پرویز مشرف نے نواز شریف دا تختہ الٹا دتا سی۔ پراسیکیوٹر نوں خاہش پاروں تعنیات نہیں کیتا جا سکدا۔ جسٹس یحییٰ آفریدی نے آکھیا کہ اسی ایس درخاست دے قابل سماعت ہون یا نہ ہون توں متعلق فیصلہ دیاں گے۔ وکیل مشرف فیصل چوہدری نے آکھیا مینوں اکرم شیخ دی بطور استغاثہ تقرری تے کوئی اعتراض نہیں۔ عدالت نے قرار دتا کہ کیس دا تحریری آرڈر بعد وچ جاری کیتا جائے گا۔ تِن صفحات تے مشتمل تحریری حکم نامے وچ آکھیا گیا کہ وزارت داخلہ نیں تاحال مکمل رپورٹ نہیں دتی۔ وزارت داخلہ آئندہ تریخ تک پرویز مشرف دی جائیداداں دی ساریاں تفصیلاں فراہم کرے۔ ڈی ایچ اے لہور تے کراچی دے ڈائریکٹر جنرلز ایڈ منسٹریٹر مشرف دی جائیداداں دی تفصیلاں دے نال پیش ہون۔ استغاثہ دے فول پروف سکیورٹی توں متعلق اعتراضات تے مشرف دے وکیل جواب دین۔ پرویز مشرف غداری کیس دے استغاثہ دی تقرری دے خلاف شاہد اور کزائی دی درخاست مسترد کردے ہوئے خارج کردتی گئی۔