مسئلہ ’’نواز‘‘ ہے؟ پانامہ، کالا باغ ڈیم تے اصغر خان کیس نہیں؟انصافی گھما؟

2018 ,جون 6



لاہور(مانیٹرنگ رپورٹ)جو کجھ انصافی گھمے راہیں ہو رہیا ہے اوس وچ ایجنڈا صاف ہے پر ہرکارے ایس نوں ہور رنگ دین وچ رجھے نیں۔ ایہہ پہلے وار نہیں ہویا۔ اک زمانے وچ مسلہ ’’بھٹو‘‘ سی تے اج ’’نواز‘‘۔ جوالائی وچ پانامہ کیس دا فیصلہ آیا سی تے ہن گیارواں مہینہ ہو گیا ہے تے پانامہ وچ ناں آئے کسے اک بندے خلاف وی کوئی کیس نہیں چل رہیا۔ جے عدالت دا ٹیچا اوہ بندے ہوندے جنہاں دا ناں پانامہ وچ ٓیا سی تے گیارہ مہینیاں دی چپ نہ ہوندی۔ اجکل اصغر خان کیس چل رہیا ہے جس وچ جنرل(ر) درانی اعترافی بیان وی دے دتا پر سزا تے انہاں نوں کسے نہیں دتی۔ اج دسیا گیا ہے پئی ہورے فوجیاں دے کیس فوجی عدالتاں وچ جان گے۔ کیہہ عدالت رٹائر فوجیاں دا کیس نہیں سن سکدی؟ایس کیس وچ درانی ہوراں ایہہ منیا پئی انہاں اسلم بیگ دے آکھن تے رقماں ونڈیاں پر ثبوت ایس دا کوئی نہیں۔ درانی ہوراں بھارتی خفیہ ایجنسی دے پردھان نال مل کے جیہڑی کتاب لکھی اوس تے انہاں نوں جھوٹا آکھن والے وی رقماں دین والے درانی دے بیان نوں سچ آکھدے نیں۔ ایس کیس نوں لمے چر بعدوں سنن مگر کیہہ کہانی ہے؟ جے ایس وچ نواز دا ناں نہ ہوندا تے ہورے ایہہ بہوں سارے مقدمیاں وانگ اینج ہی رہندا۔ آکھیا جاندا ہے ایس کیس وچ ہورے35 بندے سن تے اج پیشی تے کڈے آئے، کڈے مر چکے نیں، ایس بارے تے میڈیا وچ کوئی خبر نہ آئی۔ عابدہ حسین دے اقراری بیان دا ذکر وی چلدا رہیا سی پر اج اوہ سن یا نہیں ایس بارے وی کجھ پتہ نہیں۔ جاوید ہاشمی دے آون دی گل ہوئی پر فیر خبر ملی پئی اک گھنٹے وچ عدالت میاں نواز شریف نوں بلا لتا ہے۔ نواز دے وکیل بیان وی دتا پئی انہاں نوں ذاتی حیثیتاں وچ کسے نہیں بلایا تے بیرسٹر ظفر اللہ گل وی کیتی پر کسے نوں اجہی خبراں میڈیا تے چلانیاں ہی سن۔لگدا ہے اڈیک تے نواز ہی دی سی۔ جاوید ہاشمی جداں آکھیا پئی میں تے پنج سال نیب کیس بھگت چکیا ہاں تے ثبوت نہیں ملیا تے وڈے جج ہوراں انہاں نوں سہلایا۔ اعتزاز احسن عدالت نوں دسیا پئی نوٹس ایسے لوکاں نوں وی گھلے جنہاں دا ناں ہی رلتی نہیں تے ایس ضمن وچ خورشید شاہ دا ناں لتا۔ عدالت اپنی غلطی من لتی۔ ہن بارہ جون نوں اگلی پیشی ہو سی جس وچ نواز نوں دے وکیل نوں بلایا ہے۔ ایہہ مسلہ تے جاری ہے کہ نیب ولوں ایل این جی وچ نواز تے شاہد عباسی خلاف کیس کھولن دی گل شروع ہو گئی ہے۔ تریجے پاسے یکدم کالا باغ ڈیم دا مسلہ چکیا گیا ہے۔سنیا ہے سوموٹو وی آ گیا ہے۔ ایہہ مسلہ اک ایسے ویلے چکیا گیا ہے جداں ملک وچ قومی اسمبلی نہیں۔ ڈیم بناون دا فیصلہ تے اسمبلی وچ ہی ہو سکدا ہے، ایہہ ہک متنازعہ مسلہ ہے؟عدالت ایس بارے کیہہ کر سکدی ہے؟ کھیڈ جاری ہے کہ ایس وچ سنٹرل فگر تے میاں نواز شریف ہی نیں۔ ایل این جی دا کاروبار تے قطر نال جڑیا ہے تے ایس دا پاک قطر معاملیاں تے اثر پئے گا۔ اگے وی اک عدالتی سٹے پاروں اورنج ٹرین دا کم لما پئے گیا سی جس نال چینی سرمایہ کاریاں تے بھیڑہ اثر پیا سی تے لوک وکھرے تنگ ہوئے سن۔ نویں بنے کڈنی سنٹر دے ڈاکٹر نال جو ہویا اوس پاروں وی عدالت تے سوال وادھو۔ ہر کم نواز تے مسلم لیگ(ن) دے آل دوال گھمن نال انصاف بارے سوال وادھو۔

متعلقہ خبریں