راحیل شریف دی نویں نوکری بارے گل بات نہ کرو۔وزیراعظم دی پارٹی نوں ہدائیتاں

لاہور(مانیٹرنگ رپورٹ)میاں محمد نوازشریف ہوراں اپنی پارٹی دے ممبراں نوں ہدائیتاں کیتیاں نیں پئی اوہ سابق آرمی چیف جنرل (ر)راحیل شریف دی نویں نوکری بارے متنازعہ گلاں بند کر دین۔پر جنرل(ر) عبدالقادر بلوچ ہوری تے انہاں دے باس وی رہے نیں اتے آپ وڈے فوجی عہدیدار وی، پر ہن وزیراعظم دی ہدائیتاں بعدوں اوہ وی نہ بول سکن۔عسکری ماہر اتے پی ٹی آئی دی آگو شیریں مزاری تے ٹی وی تے آکھ چکی ہے پئی مسئلہ راحیل شریف دی نویں نوکری توں زیادہ ”اسلامی کم سنی“ اتحاد دے ٹی او آر دا ہے۔جے ریاست کول ٹی او آر ہی نہیں تاں فیصلہ کنج ہو سکدا ہے؟ جے ٹی او آر ہیگے نیں تاں قومی اسمبلی دے ان کیمرہ اجلاس وچ ہی شئیر کر لتے جاون۔جے سیاستدان مطمئن ہون گے تے میڈیائی ملاکھڑے وی مک جان گے یا ٹھنڈے ضرور پئے جان گے۔بیوروکریسی قالین ہیٹھ گند ودھان دی ماہر، پر جے جمہوری بندوبست چلانا ہے ، شفافیت دی راکھی کرنی ہے تاں اسمبلیاں وچ گل کرن نال مسئلے حل ہو سکدے نیں۔نواز شریف مسلم لیگ (ن) دے ممبراں نوں تے چپ کروا سکدے نیں پر خودشید شاہ یا عمران خان نوں تے چپ نہیں کروا سکدے۔ریاست جے ایس نوں قومی مفاد سمجھدی ہے تے پارلیمنٹ نوں اعتماد وچ لوئے تاں جے سیاسی جماعتاں وی قومی مفاد بارے گل نوں سمجھ سکن۔