لاہور (مانیٹرنگ رپورٹ)پاکستان بنن توں اج دیہاڑ تیک ملک دی سب توں وڈی سر پیڑ ” اوہ اشرافیہ جیہڑی چوناں راہیں اگے نہیں آسکدی“۔بجلی تے انہاں دا تازہ ہتھیار ہے کہ اوہ چونویں سرکاراں نوں ذلیل کرنا اپنا فرض سمجھدے نیں۔اپنے ڈرائینگ روماں وچ اوہ چونویں صوبائی تے وفاقی سرکاراں تے انہاں دے لیڈراں دا مذاق اڈاندے نیں تے لطیفے گھڑدے نیں۔مسلہ نرا لوڈشیڈنگ دا نہیں، وڈا مسئلہ تے غیر اعلانیہ لوڈ شیڈنگ دا ہے۔
جے کوئی حکومت بجلی نہ بند کرن دے حوالے نال اعلان کردی ہے تاں اوس اعلان دا مذاق کون ا

ڈواندا ہے؟ ساڈی اوہ اشرافیہ جیہڑی چوناں راہیں اگے نہیں آسکدی اوس دے چوہے وادھو نیں پر جے سیاستدان سدھے ہو گئے تے انتشار تے قابو پانا اوکھا ہو جا سی۔وزیراعظم بجلی دے حوالے نال بار بار اجلاس کردے نیں پر مسئلہ حل نہیں ہوندا۔قوم نوں دسیا جائے کون کون ایس ملک پاکستان وچ مفت بجلی ورت رہیا ہے؟ اوس بجلی دی مارکیٹ قیمت کیہہ ہے؟ اوس نوں کیوں مفت یا رعائیتی بجلی لبھ رہی ہے؟جے تریجی وار ملک دے وزیراعظم بنن والے دی گل وی ایہہ ٹیکنوکریٹ تے بیوروکریٹ نہیں منیندے تاں ایہہ کس دے انڈر نیں؟ کون انہاں نوں چلاندا ہے؟جے حکومت اعلان کیتا ہے کہ افطاری تے سحری ویلے بجلی نہ جائے تے ایس دا پاس کس رکھنا ہے؟کیہہ ایس مگر وی کوئی سیاستاں نیں؟