اک رستہ اک سڑک:چین یاترا: وزیراعظم تے چاروں صوبائی پردھان ٹر گئے، اک ہفتہ رہن گے

لاہور (مانیٹرنگ رپورٹ)چینی صدرشی چن پنگ دی دعوتاں تے پاکستانی وزیراعظم عالمی جینی پراجیکٹ ”اک رستہ اک سڑک“(One belt One road)دے عالمی فورم وچ رلت کرن گے۔سی پیک ایسے پراجیکٹ دا اک حصہ ہے۔27ملکاں دے پردھان ایس فورم وچ رلت کر رہے نیں کہ ایہہ 26ملکاں دی سربراہی کانفرنس وانگ ہے جس دی مجمانی امریکہ نے دسمبر1941وچ کیتی سی۔وزیراعظم چینی تے دوجی قیادتاں نال ملاقاتاں توں اڈ بزنس فورم نال وی خطاب کرن گے۔پورے ہفتہ دے ایس دورے تے اوہ اپنے نال چاراں صوبائی پردھاناں تے وفاقی وزیراں نوں لے کے گئے نیں کہ سب چینی ہواواں وچ کجھ ”سکھ“ دا ساہ لین گے۔پاکستان دی تریخ وچ شاہد ہی کوئی ایڈا وڈا سولین وفد کسے وی ملک دے دورے تے گیا ہوئے کہ ایہہ بدلیا بوتھا بہوں سارے ہرکاریاں نوں وارا نہیں کھاندا۔ایس وفد وچ میاں نواز شریف توں اڈ مراد علی شاہ، ثنا اللہ زہری، پرویز خٹک، میاں شہباز شریف، احسن اقبال،خواجہ سعد رفیع، انوشے رحمن،خرم دستگیر، سرتاج عزیز تے اسحق ڈار رلتی نیں۔