اورنج ٹرین بنے گی۔اصافی خرچے کون دے گا؟دو سال لگ گئے

لاہور(مانیٹرنگ رپورٹ)پچھلے سال جنوری دے میہنے لہور ہائی کورٹ ایس منصوبے بارے ڈکو فیصلہ یعنی سٹے دتا سی اتے ہن دو سالاں بعد سپریم کورٹ ایس سٹے نوں مکایا ہے۔ایہہ منصوبہ 25دسمبر نوں پورا ہونا سی۔ پر جس میہنے ایس پورا ہونا سی اوس وچ دو سالاں بعدوں فیصلہ آیا۔ایس دوران کم نہ ہون پاروں ٹھیکداراں وادھو بل پنجاب حکومت نوں دے چھڈے نیں۔ایہہ ارباں دی رقماں عوام دے ٹیکس توں دتیاں جان گیاں۔ پچھلے اٹھ میہنیاں توں ایہہ فیصلہ محفوظ سی۔گھٹ و گھٹ انہاں اٹھ میہینیاں دے خرچیاں نوں تے بچایا جا سکدا سی۔اورنج ٹرین دے مخالفاں وچ اپوزیشن وی رلتی ہے اتے بہوں سارے ہور کھڈاری وی پئی کجھ تے ایس دے تاں مارے خلاف نیں کیونجے ایہہ چینی سرمایہ کاری ہے۔ سپریم کورٹ کم جاری رکھن تے سٹے مکاون دے فیصلے وچ پنجاب سرکار نوں آکھیا ہے پئی اوہ تریہہ دناں وچ دو تکنیکی کمیٹیاں بناون۔عدالت وچ اورنج ٹرین خلاف پٹیشن لمیرے ٹھیکے لین والے اک تعمیراتی ماہر سول سوسائٹی بلارا بن کے کیتی سی۔ ایہہ کسے زمانے وچ کھبے دی اک ٹہانی پروفیسر گروپ وچ ہوندے سن اتے انہاں دے وڈکے لکھنو توں لہور اا کے لہور امپروومنٹ ٹرسٹ وچ ملازم ہوئے سن۔ہن اوہ پرانی سیاستاں تون تائب ہو چکے نیں۔سوال ایہہ ہے پئی انہاں نوں اتے انہاں جہے بہوں مخالفاں نوں کدی لہور اتے ہند سندھ دے سب توں وڈے تواریخی ورثے اندرون لہور دا خیال کیوں نہیں آیا؟ کیہہ اورنج لین منصوبے وچ چین تے نواز مخالفتاں دی سانجھ سی؟ عدالت تے ہن فیصلہ دے دتا ہے پر اجہے جعلی سول سوسائٹی نیٹ ورک پاکستان وچ پچھلے کجھ سالاں وچ وادھو نیں۔عدالتاں نوں مقدمے کرن والیاں بارے وی غور کرنا لوڑی دا ہے۔ہن پنجاب سرکار تے شہباز شریف لئی ایس ٹرین نوں جون توں پہلاں مکمل کرنا ہو سی۔دو سالان دا کم چھ میہینیاں وچ کرن نال وی خرچہ ودھے گا اتے دو سالاں وچ کم نہ ہون پاروں ٹھیکیداراں وادھو بل وی سرکار نوں دتے نیں۔جنج تواریخی عمارتاں دی حفاظت دے مسلے تے سیاستاں ہوئیاں ایس پاروں سول سوسائٹی وی ایکسپوز ہوئی۔اپوزیشن نوں ایس فیصلے نال دھچکہ لگیا ہے۔