فیصلہ سنا دتا، وجوہات بعد وچ دساں گے۔جلدی کیہہ سی؟ٹائمنگ بولدی ہے

لاہور(مانیٹرنگ رپورٹ) سپریم کورٹ دے جج آصف سعید کھوسہ ہوراں وزیراعظم میاں محمد نواز شریف نوں کڈہن بارے کیتے ریوو کیس دا فیصلہ تے سنا دتا پر انہاں آکھیا پئی وجوہات بعد وچ دساں گے۔ اوہ وجوہات وی دس دیندے تاں گل سب دے سامنے آجاندی . ہن لوک ایہہ ضرور پچھن گے پئی کیہہ فیصلہ سناون دی کوئی جلدی سی؟28جولائی توں بعد جیہڑا تاثر تواتر نال دتا جا رہیا سی عدالت کدی اوس توں پچھے ہٹ دی نظر آندی ہے تے کدی یکدم کجھ ہور نظر آندا ہے۔واٹس اپ سٹوری توں بغیر وجوہات دسے دتے فیصلہ تیک سوال زیادہ تے جواب تھوڑے نیں۔ این اے120دی چوناں توں پہلاں فیصلہ آن نال کیہہ کوئی فرق پئے گا؟ میڈیا دا اک دھڑا تے ایہہ کوشش کرے گا پئی ایس فیصلہ پاروں چوناں وچ عمران دی گڈی چکی جائے۔پر عمران تے کل آپ عدالت خلاف بول رہیا سی کیونجے الیکشن کمیشن وچ اس دے توہین عدالت کیس وچ وارنٹ آئے سن۔اپنی وکٹری تقریر وچ شیخ رشید آکھیا ہے پئی فیصلہ دین والے پنج جج سچے نیں اتے پہلی وار ججاں نواز خلاف فیصلے دتے نیں۔ ایس دا مطلب تے ایہہ ہے پئی پرانے جج نوازنال رلے سن۔ایس ریوو نوں مسترد کرن بارے تے مسلم لیگ(ن) دے لیڈراں نوں پہلاں ہی پک سی پر اوہ چاہندے سن کہ پنجوں جج مڑ جھات پاون۔اکثر فیصلیاں دی ٹائمنگ فیصلیاں توں وادھو اہمیتاں رکھدی ہے ، پر سوال ایہہ ہے کہ کیہہ ایس پہلے توں معلوم جواب دا مسلم لیگ(ن) دے ووٹراں تے کجھ اثر ہوئے گا؟ کتھے اوہ ہور پکے تے نہیں ہو جان گے؟ ایس دا فیصلہ ترے دناں وچ سامنے آ جا سی۔اگلے دو دن بال ہرکاریاں تے میڈیا کول رہے گا کہ کجھ چینل تے پہلاں توں اپنا کردار ادا کرن دے اشارے دے چکے نیں۔