پاکستان بارے سوچو۔ نواز۔سسٹم لپیٹیا جا سی۔ شیخ رشید، مظہر عباس

لاہور(مانیٹرنگ رپورٹ) یدھ ودھ رہیا ہے اتے سٹیبلشمنٹ اپنا پورا بھار پا دتا ہے۔ ہرکارے ، پیادے ہی نہیں سگوں فیل، گھوڑے، توپاں وی حرکت وچ نیں۔سولین سیکورٹی ادارے تے الزام لاون والے ایہہ دسنا نہیں چاہندے پئی ملی مسلم لیگ بارے کون کون چپ ہے تے کیوں؟ دو پاسیوں زور بربر لگ رہیا ہے۔میڈیائی دانشوراں دے تجزئیے دس رہے نیں کہ کون، کتھوں بولدا ہے؟ایم کیو ایم تے پی ٹی آئی اتحاد کس دے حکم توں ہویا کہ لندن دا پرچھاواں چھایا ہے، پر ایس نوں کنج ورتیا جا رہیا ہے ایہہ سب دے سامنے۔ڈر اوہی ہے جیہڑا مئی2006توں سٹیبلشمنٹ نوں تنگ پیا کردا ہے۔ایس ڈر توں بچن لئی کدی این آر او دا جعلی گھما بنایا، کدی جج نوں کھڑا کیتا اتے وکیلاں دے بت وچ روح پھونکی، کدی میمو گیٹ، کدی دھرنے تے28جولائی دے فیصلے اتے ہن نیب مقدمے تے ایم کیو ایم ، پی ٹی آئی ساجھے داریاں۔جے کوئی دھرنے والے دناں توں اج تیک دے ٹی وی پروگراماں نوں چیتے رکھے تے ایہہ گل سامنے آندی ہے پئی کجھ مہان اینکراں آپدی پوزیشناں کنج بدلیاں نیں۔ایس بدلاؤ نوں دوپاسیوں سمجھن نال کھیڈ ہور سمجھ آندی ہے۔لڑائی نری ایہو ہے پئی فیصلے کتھے ہون؟ چونویں ایواناں وچ یا بند کمریاں وچ۔ 5جولائی1977توں شروع ایس دنگل وچ مئی2006دے دھوبی پٹکے دی اہمیتاں وادھو جداں جمہوری میثاقاں دی گل پکی ہوئی سی۔36شقاں پڑھ لو تے تہانوں میمو گیٹ، ڈان لیکس تے اج دے مقدمیاں دا چیتا ہو جا سی۔جے ہن سب کجھ لپیٹن دا آہر کیتا گیا تے قلین تھلوں سب گند اتے آجا سی۔باہرلے تے ایس دا فیدہ چکن گے پر پاکستان وچ کس نوں فیدہ ہو سی ایس بارے پک کوئی نہیں۔ایہہ گل پکی پئی پرانے سلسلے ہن ترٹ جان گے کہ سعودی عرب وی بدلن لئی ہتھ پیر مار رہیا ہے ، ایران تے انڈیا بدل چکے نیں،پر ساڈی سٹیبلشمنٹ1950 دے دہاکے وچ ہی مست۔